DILI (TATOLI)—Prezidente Repúblika, Francisco Guterres Lú Olo, promove programa poupansa nasionál ba labarik sira liuhusi Loron Mundiál ba Ema Ho Defisiénsia ne’ebé realiza iha Palásiu Prezidente Nicolau Lobato, Bairru Pité, segunda ne’e.
Iha programa poupansa ne’e, Xefe Estadu apoiu bebé no labarik hamutuk na’in 10, hodi loke konta-bankaria ba Programa Poupansa iha Banku Nasionál Komérsiu Timor-Leste (BNCTL-sigla portugé).
“Ohin ha’u hili inan-aman sira ne’ebé mukit liu no iha oan-kosok no oan ho otas to’ o sanulu resin hitu (17). Liuhusi biban ida ne’e, ha’u hakarak atu konvida inan-aman sira hotu atu hahú rai osan ba labarik sira-nia futuru. Ha‘u sei fó osan oituan ba na’in sanulu, atu rai iha banku, ba kiik-oan sira-nia futuru,” Lú Olo hateten.
Xefe Estadu agradese ba Banku Sentrál no mós Banku Komersiál sira tanba loke programa murak ida ne’e no tinan kotuk kedas Prezidete Repúblika promove programa refere ba labarik sira.
Prezidente Repúblika mós hala’o programa seluk liuhusi komemorasaun ne’e maka fahe ai-oan ba ema ho defisiénsia nomós ema ho kondisaun normál sira atu ida-idak kuda iha nia hela-fatin ka iha fatin ne’ebé presiza ai-hun barak, liuliu iha foho-leten no mota- sorin ho intensaun atu sátan udan-been no evita rai la naksobu.
Jornalista: Xisto Freitas
Editór : Manuel Pinto
