Prezidente KFP, Faustino Cardoso, ho nia komisáriu bainhira halo soru-mutu ho funsionáriu Alfándega. Foto/Egas.

DILI, (TATOLI)-Komisaun Funsaun Públika (KFP) ho Autoridade Aduaneira (AA) realiza soru-mutu hodi hatán ba preokupasaun no dúvida ne’ebé mosu husi funsionáriu AA nian no aumezmu tempu buka atu esklarese, informa nomós atualiza kona-ba polítika sira ne’ebé oras ne’e la’o daudaun iha ámbitu Funsaun Públika nian.

“Iha preokupasaun kona-ba estatutu, saláriu, formasaun, transferénsia, mobilidade funsaun públika nian, meiu no kondisaun serbisu nian. Iha preokupasaun oinsá atubele atualiza kapasidade tuir regra ne’ebé aplika iha nivel rejionál, internasionál kona-ba Alfándega nian no kona-ba promosaun grau ne’ebé nafatin hela de’it, ne’ebé kestaun barak ne’ebé ohin mosu no ami buka esklarese no atualiza ba sira”, Prezidente KFP, Faustino Cardoso, afirma hafoin enkontru iha edifísiu AA, ohin.

Soru-mutu ba dahuluk ne’e KFP nia observasaun pozitiva katak funsionáriu sira kontente ho enkontru ne’e no partisipa ho pozitiva liuhusi pergunta sira ne’ebé hato’o.

“Iha espetativa kapa’as atu oinsá bele hasa’e nafatin dezempeñu liuhusi esklaresimentu ne’ebé maka iha no karik kontinua iha dúvida Komisaun nakloke nafatin odamatan atu sira hato’o pergunta sira ne’e hodi buka solusaun ne’ebé maka adekuada”.

Diretór Jerál Interinu AA, Julião José Ximenes, dehan reuniaun ne’e oportunu tebes ba sira tanba bele fahe informasaun ba malu no durante ne’e AA presiza tebes informasaun ne’ebé relevante no importante tebes.

“Prezidente Funsaun Públika ho nia komisáriu bele esplika kona-ba dezafiu hirak ne’ebé durante ne’e Alfándega enfrenta no hato’o ba sira para bele hatene kona-ba serbisu Alfándega nian, nune’e sira bele sente katak Alfándega nia serbisu pertenente tebes hodi buka reseita ba Estadu nomós buka fasilita komérsiu no halo kontrolu di’ak liután hodi asegura fronteira”.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here