UNITAL Sai Primeiru Lugar Sertame Nível Universidade Timor-Leste

0
280
Reprezentante no kompetitór na’in tolu husi UNITAL. Foto TATOLI: Rafy Belo

DÍLI, (TATOLI)-Universidade Oriental Timor Lorosa’e (UNITAL) sai primeiru lugar ka vensedór ba sertame nível universidade iha Timor-Leste, la inklui DIT (Dili Institute of Tecnology), ICFP (Instituto Católico de Formação Professores), ISC (Instituto Superior Cristal) tanba la konsege partisipa, kona-ba istória no Konstituisaun Repúblika Demokrátika Timor-Leste (KRDTL).

UNITAL sai primeiru lugar dezde loron dahuluk, faze eliminatóriu, ho klasifikasaun totál 1600 (obrigatóriu 750, lansada 450, sorteada ka hada’u malu 400) hodi konsege manan ekipa UNDIL (Universidade de Díli), ne’ebé atinji valór klasifikasaun 1075 (obrigatóriu 475, lansada 600, sorteada 0) nomós ensinu superiór sira seluk tan. Nune’e ekipa UNDIL hela iha segundu lugar.

Terseiru lugar monu ba ICR (Instituto Ciências e Religiosa) ho rekolla valór klasifikasaun 350 (obrigatóriu 225, lansada 225, sorteada -100) nomós IOB (instituto of Bussiness) tanba atinji valór hanesan katak 350 (obrigatóriu 100, lansada 350, sorteada -100).

Iha loron daruak, nu’udar faze finál no determinante, UNDIL la konsege hadau pozisaun UNITAL nian, nune’e ekipa UNITAL kontinua lidera no mantein nia pozisaun iha primeiru lugar basá kontribui tan valór 800 (obrigatóriu 500, lansada 100, sorteada 200). Enkuantu UNDIL kontribui de’it valór 375 (obrigatóriu 375, lansada 0, sorteada 0).

Tanba ne’e, sertame nível universidade, ne’ebé organiza husi Alumni Parlamentu Foinsa’e Timor-Leste (APFTL) ho apoiu husi Sekretáriu Estadu Juventude no Desportu (SEJD) ba tinan ida ne’e, UNITAL mak sai primeiru klasifikadu.

Reprezentante no kompetitór UNITAL, Remígio Perreira da Cruz hateten katak ema bele dehan no interpreta katak universidade privada, UNITAL ne’e nia konstrusaun no fasilidade la di’ak, maibé UNITAL iha mós dignidade hodi kompete katak UNITAL ne’e mós eziste.

“Ha’u orgullu tanba bele lori ha’u-nia universidade i la’ós ida ne’e no iha ne’e de’it. Tanba ne’e, garante kualidade la’ós mai husi edifísiu eskola tenke di’ak no andar, mak ita dehan di’ak. Garante kualidade depende ba ita-nia aan rasik,” dehan estudante UNITAL, Remígio Perreira da Cruz ba Ajénsia TATOLI, iha Uma Nahe Biti-Boot, SEJD, Lecidere-Díli, ohin, hafoin tuir sertame.

Iha biban ne’e, estudante semestre walu, Fakuldade Direitu (FD), Remígio Pereira da Cruz ne’e enkoraja mós estudante hotu, tantu husi ensinu sekundáriu ne’ebé mak atu mai nomós estudante ativu UNITAL nian katak tenke foti no tane bebeik nafatin dignidade UNITAL nian.

“Ita tenke foti dignidade UNITAL nian maske enfrenta difikuldade oioin. UNITAL, universidade privada ida, nia iha dignidade atu kompete mós ho universidade sira seluk,” enkoraja estudante Remígio Perreira da Cruz.

“Tanba ne’e, ita lalika lakon vontade katak universidade sira seluk de’it mak di’ak maibé UNITAL mós di’ak. UNITAL mós iha kualidade,” reforsa tan reprezentante no kompetitór sertame husi UNITAL, Remígio Perreira da Cruz, ne’e.

Kompetitór UNITAL alende Remígio Pereira da Cruz, reprezenta no inklui mós estudante na’n rua seluk hanesan Arman L’eythe no Dion March (naran estimadu). Enkuantu, segundu lugar, UNDIL, reprezenta husi Marcos Mariz Pinto, Joaquina Klau da Cruz no seluk tan.

Iha fatin hanesan, hafoin anúnsiu rezultadu finál husi ekipa juri, reprezentante ekipa juri, Mateus Lemos ba kompetitór sira hotu katak manan ka lakon ne’e kompetisaun, maibé importante mak koñesimentu, no iha biban hanesan estudante sira bele koñese malu di’ak liután.

“Manan hetan prémiu, bele osan maibé sei no bele hotu. Hetan sertifikadu, sertifikadu loron ida bee bele kona, bele bokon, nakles no seluk tan maibé valór boot liu mak valór istória, kultura. Matenek ne’ebé iha ita-nia kakutak nunka hotu Maromak hasai mak hotu,” dehan reprezantante ekipa juri ne’e.

Nune’e mós, nia akresenta katak durante atividade sertame ne’e la’o, parte ida hodi komemora loron Masakre 12 Novembru 1991 no Loron Nasionál Juventude, karik iha fallansu ruma, husu nafatin sujestaun no krítika konstrutiva sira. Inklui, agredese mós partisipasaun husi estudante universitáriu sira hotu ba atividade ne’e.

Agradesimentu hanesan hato’o mós husi Prezidente Ezekutivu APFTL, Zaulino Gomes da Silva nomós Diretór Nasionál Juventude, SEJD, David Tomas de Deus.

Entretantu, ekipa juri ba sertame nível universitáriu tinan ida ne’e preside husi juri Cesar Ferreira Amaral (membru APFTL), Marcos da Cruz (husi SEJD) no Mateus Lemos (husi CNJTL-Conselho Nacional de Juventude Timor-Leste).

Jornalista: Rafy Belo

Editór : Manuel Pinto

HUSIK IDA HATÁN