“Timor Oan Tenke Hamutuk Dezenvolve Nasaun”

0
89
Sekretáriu Estadu Komunikasaun Sosiál, Merício Juvinal dos Reis “Akara” bainhira reprezenta estadu no governu komemora 28 Novembru iha Manatuto. Foto SEKOMS: Verónica Ximenes

MANATUTU, (TATOLI) – Veteranu no eis kombatente libertasaun nasionál, munisípiu Manatutu, husu ba jerasaun foun sira atu banati tuir espiritu nasionalizmu no patriotizmu eroi sira nian nomós valór Proklamasaun Indepedénsia 28 Novembru ninian.

Katak, labele husik malu, tenke iha unidade, fó liman ba malu para depois halo dezenvolvimentu ba ita-nia rain.

“Labele ke’e malu, labele dehan uluk ami mak halo funu, imi la halo funu, maibé agora ita halakon hanoin hirak ne’e, ita tenke hamutuk halo dezenvolvimentu ba ita-nia rain”, dehan Veterana, Juliana de Sousa Henrique naran kódigu funu “Biroza”, ba jornalista sira iha munisípiu Manatutu, postu administrativu Manatutu Vila, kuarta (28/11).

Iha fatin hanesan Veteranu, Sebastião Soares “Mau Kuri”, hateten veteranu hakarak feliz ba ukun án ida ne’e, maibé ida ne’e sei la posível bainhira lider sira la hamutuk nomós akresenta veteranu nafatin hatudu nia prontidaun hamutuk ho lider sira, liuhusi fó hanoin no sujestaun sira. Nune’e mós husu ba joven sira atu kontribui ba dezenvolvimentu.

“Husu ba joven sira nu’udar fini Timór, tenke banati tuir polítiku sira ne’ebé mak partisipa iha dezenvolvimentu ida ne’e, mai husi funu naruk ida ne’ebé mak dezde setenta cinco to’o mai agora”, hateten Mau Kuri.

Iha marjen serimónia 28 novembru ne’e, Prezidente Konsellu Juventude Manatutu, Domingos Alexandre Soares, hateten komemorasaun 28 Novembru ba da-43, prinsipalmente ba joven Munisípiu Manatutu mak oinsá banati tuir hahalok  patriotizmu no nasionalizmu eroi, saudozu no veteranu kombatete sira ninian.

Nune’e mós reforsa juventude presiza hatene di’ak liután prosesu luta durante ne’e to’o atinje ita-nia indepedénsia ne’ebé restaura iha 20 maiu.

“Tanba ne’e importante ba juventude munisípiu ida ne’e espera valoriza nafatin loron ida ne’e atu hametin nafatin unidade, atu labele monu ba tentasaun no hahalok sira ne’ebé la valoriza prinsípiu luta iha momentu ne’ebá. Ha’u hanoin ida ne’e mak importante”, dehan prezidente konsellu juventude ne’e.

Iha biban hanesan, juventude feto ida, Luizinha Marçal Soares Lopes Lay, hato’o mós nia opiniaun katak dezenvolvimentu nasaun ne’e nian depende ba joventude tanba joventude mak sai ai-riin ba nasaun.

Nune’e mós hodi valoriza Proklamasaun indepedénsia, juventude tenke badinas; kualker atividade iha munisípiu, postu administrativu no suku tenke kontribui voluntariamente.

“Ita tenke iha espiritu voluntáriu, patriotizmu ba ita-nia rai ida ne’e, tanba ita-nia eroi sira fakar ran ba ita-nia bandeira (nasionál-red) ida ne’e. Ita tenke kaer nafatin sentimentu ida ne’e”, katak estudante Sekundária Jerál Kay Rala, Manatutu ne’e.

“Saida mak sira halo ba ita-nia rai doben ida ne’e, ita tenke prezerva didi’ak. Sai juventude ita tenke kontribui”, insiste Luizinha Marçal Lay hodi hakotu.

Entretantu komemorasaun 28 Novembru iha munisípiu Manatutu, postu administrativu Manatutu Vila, komemora ho atividade desportiva nomós feira, ne’ebé mak sei prolonga to’o 7 dezembru, loron invazaun Indonézia mai Timor.

Ajénsia TATOLI observa mós katak komemorasaun loron istóriku ne’e komunidade entuziasmu hodi partisipa.

Jornalista: Rafy Belo

Editora: Rita Almeida

HUSIK IDA HATÁN