Sosiedade Sivíl Husu Xefe Estadu Veta Proposta Alterasaun Lei Atividade Petrolífera

0
140
Enkontru entre sosiedade sivíl no Prezidente Repúblika iha Palásiu Prezidente Nicolau Lobato, segunda ne’e. Imajen Mídia PR

DILI, (TATOLI) – Sosiedade Sivíl hanesan Forum Organizasaun Naun Govermentál Timor-Leste (FONGTIL) no Lao Hamutuk husu Prezidente Repúblika, Francisco Guterres Lú Olo, atu veta proposta alterasaun ba lei nú 13/2005 kona-ba Atividade Petrolífera.

Sosiedade sivíl la konkorda mudansa lei ne’e tanba Governu hasai tiha kompeténsia Kámara Kontas atu fó vistu prévia ba kontratu sira ne’ebé iha ligasaun ba asuntu petrolífera.

“Governu no Parlamentu altera artigu 22 hosi lei ne’e (Atividade Petrolífera) atu hasai tiha kbiit no kompeténsia Kámara Kontas hodi halo supervizaun ka vistu prévia ba kontratu ne’ebé iha ligasaun ba asuntu petrolífera”, Diretór FONGTIL, Daniel Santos do Carmo, ba jornalista sira iha Palásiu Prezidente Nicolau Lobato, Bairru Pité, segunda ne’e, hafoin enkontru ho Xefe Estadu.

Tuir nia seidauk iha nesesidade atu altera lei refere tanba lei atuál (Atividade Petrolíferu) garante transparénsia no akuntabilidade.

Iha biban ne’e, Peskizadór Lao Hamutuk, Celestino Gusmão, reforsa tan sosa asaun ka projetu sira hotu tenke tama iha kanál Kámara Kontas nian atu bele fó vistu no molok fó vista Kámara Kontas buka tetu ho lei sira ne’ebé relevante para asegura sistema legál sira.

“La presiza altera Lei Atividade Petrolífera tanba lei ne’e fó seguransa di’ak ba ita-nia rai liu-liu iha atividade petrolífera”, afirma.

Proposta alterasaun ba lei refere oras ne’e iha ona Prezidente Repúblika nia liman, maibé Xefe Estadu sei rona sosiedade sivíl sira nia opiniaun molok hola pozisaun tuir nia kompeténsia.

Governu husu alterasaun ba Lei Atividade Petrolífera ne’e iha 22 outubru liu-ba. Proposta alterasaun ne’e sei fó dalan ba Estadu atu partisipa iha Joint Venture (konsórsiu) ho partisipasaun asaun liu porsentu 20.

Jornalista: Xisto Freitas

Editora: Rita Almeida

HUSIK IDA HATÁN