Sosiedade Sivíl Husu PN Deskuti Kle’an OJE 2019

0
36
Analista hosi Core Group Transparency (CGT), Juvinal Diaz

DILI (TATOLI)—Analista hosi Core Group Transparency Timor-Leste (CGT-TL), Juvinal Diaz, husu ba Parlamentu Nasionál (PN) atu halo diskusaun kle’an liu kona-ba tanbasá Governu propoin orsamentu jerál Estadu (OJE) 2019 ho montante boot (biliaun $1,8) no projetu sira ne’ebé Governu dezeña ne’e iha tiha ona análize ekonómiku no sosiál ka lae.

Tuir nia, orsamentu ho montante biliaun $1.8 ne’e nu’udar orsamentu ida ne’ebé boot liu iha istória Timor no hatutan katak kuandu orsamentu jerál sa’e boot hanesan ne’e, implika ba reseita petrolífera hahú menus ona.

“Utilizasaun orsamentu ida ne’e ultrapasa pursentu 3 hosi Lei Fundu Petrolíferu. Se ita kálkula miloens 600 ba Rendementu Sustentável Estimativa (RSE), maizumenus doubru dala tolu kompara ho RSE ne’ebé iha ne’e (biliaun $1,8). Ne’e perigu liu,” nia dehan ba Tatoli iha nia kna’ar fatin, Fatumenta, Dili, sesta ne’e, relasiona proposta OJE 2019 ho montante biliaun $1.8 ne’ebé Governu haruka ona ba PN iha kinta horsehik.

Juvinal afirma, bainhira mantein beibeik orsamentu ho montante boot hanesan ne’e iha futuru, reseita minarai bele hotu, espesialmente kuandu esplorasaun Greater Sunrise la hahú lalais, entaun nasaun ida ne’e  bele monu ba krize finanseiru.

“Orsamentu refere barak liu atu selu de’it projetu rekorente, dívida sira ne’ebé iha tinan kotuk no finansia projetu boot ne’ebé nia retornu sei dúvida maka hanesan Projetu Tasi Mane. Tanba ne’e, ami hanoin katak Estadu tenke halo análize ba kustu no benefísiu hosi projetu sira ne’ebé atu halo,” nia sujere.

Tuir nia katak montante orsamentu tenke asegura sustentabilidade fiskál, katak, tenke investe iha setór sira ne’ebé sei substitui rendementu minarai maka hanesan agrikultura, turizmu, edukasaun, saúde no sel-seluk tan.

Kona-ba kapasidade ezekusaun, analista ne’e haklalen, atu gasta de’it orsamentu ne’e fásil maibé atu ezekuta ho kualidade ne’e maka susar atu atinji, ne’e duni, nia husu ba membru Governu sira atu ezekuta orsamentu ho kualidade.

Jornalista: Xisto Freitas

Editór : Manuel Pinto

HUSIK IDA HATÁN