Rezultadu Peskiza UNTL Hatudu Rock-Melon Bele Kuda iha Bee Menus no Rai-Krekas

0
126
Kolleta rezultadu peskiza. Foto: UNTL

DÍLI, (TATOLI)-Rezultadu peskiza ne’ebé hala’o husi Universidade Nasionál Timor Lorosa’e (UNTL), Fakuldade Agrikultura, Departamentu Agronomia ho Ai-Com hatudu katak Rock-Melon, bele kuda iha Timor-Leste, alende foremungu, forekeli, tomate, ai-manas, melansia, pateka (melansia) ho bee ne’ebé menus no rai-krekas.

Peskiza ne’e hala’o husi universitáriu finalista na’in 12 durante fulan neen iha área Vemasse tasi, Postu-administrativu Vemasse, Munisípiu Baucau no ikus mai konsege kolleta.

Koordenadór Peskiza, Profesór Acacio da Costa Guterres rekoñese katak iha dezeñu ba peskiza ne’e, balun la susesu no balun susesu. Maibé, durante peskiza no kolleta ba datoluk, hatudu ona imajen di’ak atu promove ba públiku.

“Dadus ne’e sei lori ba iha nível-altu hodi halo mobilizasaun ba hasa’e produsaun no rendimentu iha moris agrikultór sira nian, tanba ne’e ami aposta iha seguransa-alimentár, valór-ekonomia no nutrisaun,” haktuir komunikadu Mídia Komunikasaun UNTL, ba Ajénsia TATOLI, ohin.

Koordenadór Peskiza Profesór Acacio da Costa Guterres subliña razaun sira hodi lokaliza peskiza iha área vemasse tasi nian ne’e.“Ami iha objetivu rua; dahuluk Governu gasta osan barak konsturi irigasaun kobre Laleia ho Vemasse, daruak rai ne’e potensiál maibé la utiliza ho másimu, tanba ne’e ami orienta estudante sira liuhusi peskiza ne’e ho meiu ida hasa’e produsaun ho bee ne’ebé menus no rai-krekas”.

Iha fatin hanesan, Peskizadór Cornelio dos Santos Verdial hateten, haree husi área ne’e, baibain halo de’it natar no nutriente rai nian krekas liu, maibé liuhusi métodu foun ne’e bele kuda fali ai-horis seluk hodi habokur rai atu hasa’e produsaun haré.

“Tanba ne’e tatoli ba autoridade lokál sira atu hato’o informasaun hirak ne’e ba komunidade atu labele abandona de’it área ne’e, maibé bele servisu hamutuk hodi kuda fali ai-horis no ai-fuan sira bele hasa’e rai nia bokur no nutrisaun família nian”.

Relativamente ho kolleta ne’e, Magnífiku Reitór UNTL, Francisco Miguel Martins iha fatin koleta (8-11) apresia ho rezultadu peskiza ne’e tanba estudante sira konsege kompartilla teória ba iha prátika kampu nian.

“Ohin ita mai asiste rezultadu peskiza esprimentál ne’ebé estudante sira hala’o liuhusi konkretizasaun ba teória ne’ebé sira simu husi profesór sira iha universidade no orienta sira iha prátika ne’e ho rezultadu ida di’ak tebes,”.

Tuir komunikadu ne’e, profesór UNTL ne’e akresenta katak mezmu tempu bai-loron maibé estudante (peskizadór) sira, hatudu kualidade; liuhusi prosesu ensinu-aprendizajen teória no prátika iha kampu no laboratoriál.

“Haree husi rezultadu ohin ne’e buat ida interesante ne’e maka rock-melon bele kuda iha Timór, maibé ho peskiza ba sira-nia monografia ne’e bele”.

Ai-horis ne’ebé hetan rezultadu kolleta di’ak iha peskiza ne’e maka foremungu, forekeli, tomate, ai-manas, melansia, pateka (melansia) no krock-melon (melão, iha Portugés).

Iha peskiza ne’e peskizadór na’in hitu no peskizadora nain lima maka destaka iha lokál ne’e durante fulan ho tópiku peskiza oioin ho supervizaun husi dosente orientadór sira Departamentu Agronomia nian.

Jornalista: Rafy Belo

Editór : Manuel Pinto

HUSIK IDA HATÁN