Profisionál KomSos 26 Partisipa Formasaun Literasia Orsamentál

0
72
Profisionál komunikasaun sosiál Timor-Leste hamutuk 26 husi instituisaun Estadu no mídia privada partisipa iha literasia orsamentál no finanseira. Foto/UE em Timor-Leste.

DILI, (TATOLI) – Profisionál Komunikasaun Sosiál (KomSos) Timor-Leste hamutuk 26 husi instituisaun Estadu no mídia privada partisipa literasia orsamentál no finanseira iha ámbitu projetu parseria ba melloria prestasaun servisu liuhusi reforsu jestaun no supervizaun finansas públikas (PFMO, sigla iha inglés) durante semana rua.

Asaun kapasitasaun PFMO (Public Financial Management and Oversight) dahuluk ba pesoál komunikasaun sosiál sira ne’e hala’o tanba organiza husi PFMO-Uniaun Europeia (UE) iha Timor-Leste no Konsultóriu Língua Portugeza, projetu ezekutadu husi Camões, Institutu Kooperasaun no Língua I.P, no realiza ho kolaborasaun ho CENJOR (Centro de Formação de Jornalistas de Portugal) ho apoiu husi Sekretáriu Estadu Komunikasaun Sosiál no Konsellu Imprensa Timor-Leste atu dezenvolve kompeténsia jornalista iha área koñesimentu no tratamentu informasaun iha matéria Orsamentu Estadu no Finansas Públikas, liuliu iha nia supervizaun.

Embaixadór Portugál ba Timor-Leste, José Pedro Machado Vieira, hatete iha projetu rua ne’ebé dirijidu ba jornalista timoroan.

“Iha kazu konkretu ne’e atu melloria kapasitasaun ba tratamentu relasiona ho orsamentu, finansas públikas ho informasaun ne’ebé hato’o ba sosiedade, mas projetu ne’e kooperasaun delegada ne’ebé finansiadu husi Uniaun Europeia no Portugál ne’ebé organiza husi Instituto Camões”, katak nia hafoin halo abertura iha salaun Konsultóriu Língua Portugeza, Kintál-Boot, ohin.

Nia hatutan iha projetu bilaterál seluk (Timor-Leste no Portugál) mak Konsultóriu Língua Portugeza ba jornalista ne’ebé importante tebes no susesu, tanba grasa ho empeñu formadór no formandu sira ne’ebé iha faze dahuluk kapasitasaun iha dalen portugés no daudaun entre jornalista sira ne’e bele avansa iha formasaun téknika liu kona-ba orsamentu, tanba ne’e área ida importante ba dezenvolvimentu Timor-Leste.

Delegasaun Uniaun Europeia iha Timor-Leste, Simon Le Grand, dehan atividade ne’e importante tanba jornalista iha papél atu esplika ba públiku kona-ba orsamentu Estadu nian.

“Públiku tenke komprende prosesu orsamentu nomós finansas públikas. Ami hanoin katak formasaun ba jornalista ne’e espesiál, atu nune’e bele hato’o mensajen ba públiku en jerál iha maneira transparente no abranjeiru”.

PFMO mak programa ida ho valór millaun €14,6 (millaun $14,3), ne’ebé maka husi ne’e millaun 12 finansiada husi Uniaun Europeia, iha ámbitu 11.o Fundu Europeu Dezenvolvimentu nian, no rihun 600 finansiadu husi Camões I.P, entidade ne’ebé delegada mós ba responsabilidade ba ezekusaun projetu.

Formasaun ne’ebé hahú 13 to’o 23 novembru ne’e, jornalista husi rádiu, televizaun, jornál, ajénsia komunikasaun, orgaun komunikasaun dijitál no servisu komunikasaun iha Prezidénsia Konsellu Ministru sei preparadu ba analiza, tranzmite no komunika  matéria téknika relativa ba diskusaun, aprovasaun no fiskalizasaun orsamentu Estadu no matéria finansas públikas iha Timor-Leste ne’ebé maka sei dirije husi formadora Helena Garrido, dosente no jornalista portugeza espesializada ba asuntu ekonómiku no finanseiru.

Jornalista: Maria Auxiliadora

Editora: Rita Almeida

HUSIK IDA HATÁN