Nova Zelándia Sei Apoiu Dezenvolvimentu TL

0
94
Ministériu Negósiu Estranjeiru no Kooperasaun (MNEK). Foto: MNEK

DILI, (TATOLI) – Governu Timor-Leste no Nova Zelándia halo diálogu kooperasaun bilaterál nomós kestaun rejionál, internasionál no kooperasaun iha Ministériu Negósiu Estranjeiru no Kooperasaun (MNEK), Praia dos Coqueiros, ohin.

Diálogu ofisiál ne’e ba daruak entre governu rai rua nian. Dahuluk hala’o ona iha 2015.

Diretór Jerál Asuntu Asian no Oseania, Lisualdo Gaspar, ba jornalista sira iha marjen diskusaun ne’e katak durante diskusaun Nova Zelándia demonstra sira-nia vontade hodi kontinua apoia Timor-Leste.

“Iha enkontru bilaterál ida ne’e, governu Nova Zelándia reafirma sira-nia kompromisu atu kontinua nafatin apoiu implementasaun Planu Estratéjiku Dezenvolvimentu Timor-Leste nian nomós apoiu programa oitavu governu nian, ne’ebé mak ita aprezenta durante ne’e. Katak, sira ihakompromisu i klaru sira sempre alinea sira-nia programa ajudu”, haktuir Diretór Lisualdo Gaspar.

Diretór Lisualdo Gaspar mós katak durante dialógu la’ós de’it ko’alia kooperasaun bilaterál maibé mós toka kona-ba asuntu rejionál nomós bilaterál seluk, liliu revee programa kooperasaun ne’ebé mak TL halo ho Nova Zelándia.

“Ita halo liuhusi dokumentu ne’ebé hanaran joint commitment for development (kompromisu dezenvolvimentu konjunta) entre nasaun rua nian ne’ebé mak kobre área prioridade ne’ebé mak iha nomeadamente área agrikultura, edukasaun, institusionál, liliu justisa ninian i durante enkontru ne’e haree oinsá implementasaun programa ne’e ninian i haree oinsá mak ba oin”, esplika diretór.

Diretór ne’e mós konsidera governu foun, Nova Zelándia mós iha governu foun; nasaun rua fahe malu oinsá mak prioridade governu rua ninian no atu haree oinsá mak ba futuru bele haree área prioridade sira ne’e atu tau hamutuk ka hadi’a liután antes ‘joint commitment’ ne’e hotu iha 2020.

Diretór Lisualdo Gaspar mós afirma neste momentu governu Nova Zelándia oferese bolsu estudu ba timoroan na’in 15 tinan-tinan atu ba eskola hasai lisensiatura, baxarelatu, mestradu no doutoramentu.

“Alende ida ne’e, sira mós oferese treinamentu ba profisionál ofisiál sira. Ita iha programa English Language Training (Eltra) ba ofisiál sira husi ministériu barbarak, ne’ebé mak tinan ida ba dala tolu nomós iha treinamentu asisténsia. Purezemplu uluk sira mai fó iha rejistu kareta ninian nomós oinsa mak ajuda iha sistema finansa governu nian”.

Partisipa iha dialogu ne’e alende MNEK ho Nova Zelándia inklui mós reprezentante sira husi ministériu seluk, iha governu Timor-Leste.

Jornalista: Rafy Belo

Editora: Rita Almeida

HUSIK IDA HATÁN