MTKI Introdús Turizmu Kruzeiru Ba Estudante UNTL no DIT

0
52
Diretór Jerál Turizmu, José Filipe Dias Quintas, fahe informasaun sobre turizmu kruzeiru ba estudante husi UNTL no DIT. Foto/MTKI.

DILI, (TATOLI)-Ministériu Turizmu, Komérsiu no Indústria (MTKI) halo soru-mutu ho estudante sira husi Universidade Nasionál Timor Lorosa’e (UNTL) no Dili Institute of Technology (DIT) liuliu Departamentu Turizmu hodi introdús kona-ba turizmu kruzeiru no halo evaluasaun sobre eventu turizmu mundiál ne’ebé hala’o iha setembru liubá.

Diretór Jerál Turizmu, José Filipe Dias Quintas, hatete enkontru ida ne’e importante tebes tanba envolve estudante turizmu husi universidade rua ne’e atu fahe informasaun hodi hakle’an liután sira-nia koñesimentu liuliu iha produtu turizmu kruzeiru.

“Tanba ita hotu hatene katak turizmu kruzeiru se ita haree ba dadus ne’ebé ita iha komesa sa’e neineik. Ne’ebé liuliu Governu bele haree para produtu ne’e ita bele dezenvolve liután iha futuru”, Quintas katak iha Sentru Konvensaun Dili, ohin.

Ministériu sempre envolve estudante sira ne’e bainhira ró kruzeiru mai Timor-Leste hodi sai voluntáriu ba antendimentu turista sira.

“Alin sira ne’e balun iha inglés di’ak para prátika ho ita-nia turista husi rai-li’ur para bele iha koñesimentu entermu língua no área turizmu nian”.

Diretór Jerál ne’e hatutan nia aprezenta mós sobre dezenvolvimentu turizmu en jerál ne’ebé aliña ba Planu Estratéjiku Dezenvolvimentu Nasionál (PEDN) 2011-2030 no polítika nasionál turizmu nian ba 2030 ne’ebé aprova iha Sestu Governu Konstitusionál ba estudante sira ne’e atubele hatene tanba iha nasaun ne’ebé de’it Governu mak halo polítika no regulamentasaun no serbisu hamutuk ho parseiru sira para dudu turizmu ne’e bá oin.

“Fahe informasaun planu estratéjiku ne’ebé liga ba turizmu nian nomós foka liubá produtu turizmu kruzeiru tanba ne’e la’ós lori de’it benefísiu, maibé dalaruma mós negativu. Se ita haree ba kontestu ambiente nian sira mai mós kadavés lori óleu mai fakar iha tasi-laran nomós estraga ita-nia ahu-ruin. Bá oin sei koordena ho ministériu relevante para komesa haree regulamentu ida ba turizmu kruzeiru para asegura ita-nia rekursu naturál sira ne’e”.

Quintas afirma iha 2019 númeru xegada turista mai Timór sei sa’e tanba bazea ba dadus 2017 hetan rihun 77 resin no atu taka tinan ida ne’e komesa sa’e ba rihun 100 resin, nune’e tuir PEDN iha 2030 Timor-Leste bele atinje númeru turista 200.000 kada tinan.

“Ita-nia produtu ne’ebé interesante liu maka kultura nomós istória, tanba produtu ne’e maka halo ita diferensa ho destinu turístiku seluk”.

Jornalista : Maria Auxiliadora

Editór : Manuel Pinto

Lee mós : http://www.tatoli.tl/2018/10/negosiu-ro-kruzeiru-iha-timor-leste-hahu-dezenvolve/

HUSIK IDA HATÁN