iklan

NASIONÁL, POLÍTIKA

KM Aprova Rezolusaun Governu Ba Kontratu Akizisaun Interese Greater Sunrise

KM Aprova Rezolusaun Governu Ba Kontratu Akizisaun Interese Greater Sunrise

Primeiru-Ministru, Taur Matan Ruak, lidera enkontru Konsellu Ministru, kuarta, (21/9). Imajen António Goncalves

DILI, (TATOLI) – Governu liuhosi reuniaun Konsellu Ministru (KM) estraordinária aprova kontratu akizisaun interese partisipasaun no direitu iha kampu Greater Sunrise, hanesan partisipasaun Timor-Leste iha operasaun petrolíferu no transferénsia ba interese partisipativu no direitu sira ne’ebé a favór ba Timor Gap, hanesan jestór ba interese partisipativu no direitu hirak resprezenta Estadu.
“Konsellu Ministru endonsa akizisaun interese partisipasaun Shell Energy Austrália iha kampu Greater Sunrise joint venture, ne’ebé asina ona iha Bali, Konsellu Ministru fó aprovasaun ba prosesu ne’e hodi hala’o ba oin”, tenik Ministru Estadu no Prezidénsia Konsellu Ministru, Agio Pereira, ba jornalista sira, ohin.

Tuir Governante ne’e ho akizisaun Timor-Leste iha ona porsentu 57 interese partisipasaun iha joint venture Greater Sunrise, ne’ebé planu Governu nia sei lori kadoras ba Beaço, Vikeke.

Entretantu, Governu Timor-Leste no Shell Austrália iha loron 21 novembru iha Bali (Indonézia), asina ona akordu faan no sosa (SPA-Sales and Purchase Agreement), hodi sosa partisipasaun empreza Shell porsentu 26,6, iha konsórsiu kampu Greater Sunrise ho montante milliaun $300.

Antes ne’e iha loron 28 setembru, Reprezentante Espesiál, Xanana Gusmão no Prezidente ConocoPhillips Austália osidente, Chris Wilson asina ona akordu atu Governu Timor-Leste sosa ona partisipasaun porsentu 30 ConocoPhilips iha kampu Greater Sunrise ho montante milliaun $350.

Parseiru joint venture Greater Sunrise nia mak hanesan Woodside (operadora) ho partisipasaun porsentu 33,4, ConocoPhillips pursentu 30, Shell pursentu 26,6 no Osaka Gas porsentu 10.

Jornalista: Julia Chatarina

Editora: Rita Almeida

iklan
iklan

Leave a Reply

iklan
error: Content is protected !!