KM Aprova Proposta Lei OJE 2019 Biliaun $1,827

0
127
Primeiru-Ministru, Taur Matan Ruak prezide reuniaun iha Konsellu Ministru.

DILI, (TATOLI) – Governu konstitusionál da-ualu liuhosi reuniaun Konsellu Ministru (KM) kuarta, aprova ona proposta lei Orsamentu Jerál Estadu (OJE) 2019 ho montante biliaun $1,827 no sei submete ba Parlamenu Nasional (PN) kinta (8/11) aban, tuir kalendáriu ne’ebé antes ne’e governu determina ona.

Ministra Finansa em ezersísiu, sara Lobo Brites, katak reuniaun ezekutivu horisehik, Ministériu Finansa (MF) halo aprezentasaun husi parte tékniku no tetu orsamentu, nune’e ohin foin aprova.

“Konsellu Ministru aprova orsamentu ba tinan 2019 hamutuk biliaun $1,827, inklui imprestimu miliaun $87, entaun hasai imprestimu ninia totál biliaun $1,740”, tenik ba jornalista sira hafoin reuniaun iha Palásiu Governu, ohin.

Nia dehan impéstimu miliaun $87 atu finansia projetu infraestrutura hanesan estrada no seluk tan.

Governante ne’e akresenta kona-ba diskrisaun ba kada kategoria hanesan saláriu no vensimentu, bens no servisu, transferénsia públika, kapitál menor no kapiták dezenvolvimentu, kuandu halo submisaun ba PN mak sei fó sai montante ba kada kategoria ne’e.

Tuir Portál ofisiál governu, atu hatur orsamentu 2019, konsidera mós despeza tomak tuir kategoria oioin no Estadu nia investimentu sira liuhosi Fundu Infraestrutura kona-ba programa no projetu oioin ne’ebé daudauk la’o hela no hirak ne’ebé atu hahú.

Antes ne’e, KM aprova ona tetu orsamentál fiskál 2019 ho montante biliaun $1,350 ne’ebé MF aprezenta iha jornada orsamentál.

Tetu ho montante biliaun $1,350 ne’e hanesan aprovasaun ba limite másimu husi orsamentu no distribui envelope fiskál ba liña ministeriál hotu-hotu.

Montante orsamentu tinan 2019 aumenta, hafoin mosu proposta barak bainhira Komité Polítiku Revizaun OJE 2019 halo enkontru ho instituisaun estadu sira, ho objetivu atu haree oinsá bele aloka estratéjia husi reskursu sira atu bele atinje kompromisu no objetivu ne’ebé hakerek iha dokumentu estratéjiku sira no kumpre ho rigór ba planu tinan finanseiru 2019, ba elaborasaun proposta OJE.

Jornalista: Julia Chatarina

Editora: Rita Almeida

HUSIK IDA HATÁN