Governu Kontinua Apoiu Osan-Tékniku Ba Radio Komunidade

0
52
Sekretáriu Estadu Komunikasaun Sosiál, Mericio Juvinal dos Reis Akara hato’o kompromisu durante observa direta kondisaun Radio komunidade Cafe Ermera iha Gleno munisípiu Ermera ohin

ERMERA, (TATOLI)-Sekretáriu Estadu Komunikasaun Sosiál,  Mericio  Juvinal dos Reis Akara informa governu sei kontinua apoiu osan no tékniku ba dezenvolvimentu Radio Komunidade durante tinan 5.

Akara hato’o kompromisu nee durante observa direta kondisaun Radio komunidade Cafe Ermera iha Gleno munisípiu Ermera ohin

“Ohin Ha’u mai hare rasik sira nia kondisaun no preokupasaun tanba nee, governu iha kompromisu apoiu rihun 15 kada tinan ba radio komunidade inklui radio cafe Ermera,” Mericio deklara.

Nia informa, Governu prevee ona polítika no orsamentu apoiu kada tinan tuir nesesidade rádiu komunidades entermus,  finansiamentu, fasilidades no formasaun ba jornalista hodi aumenta tan kapasidade no koñesimentu ba dezenvolvimentu radio hodi tranzmite informasaun ba komunidade.

Tanba ne’e, Mericio husu ba jestór radio komunidade nee atu dezenvolve di’ak liután hodi sai kontrolu sosiál ba dezenvolvimentu nasaun.

Iha fatin hanesan Presidente konsellu Radio komunidade cafe,  Pedro do Assunção Gonçalves agradese ba inisiativa governu hodi apoiu finanseiru no tékniku ba Radio komunidade sira maski iha nasaun barak iha mundu radio komunidade labele hetan fundus hosi Governu.

Durante ne’e, tuir Pedro programa esensiál hosi radio Café Ermera ho frekuénsia 92.3MHZ  mak hanesan,  informasaun, edukasaun sívika, divertimento, radio movel, programa labarik no seluk tan, fó sai durante tinan 18 ho jestór na’in ida inklui voluntáriu na’in 5.

Iha parte seluk Presidente Autoridade Munisípiu Ermera,  Jose Martinho dos Santos Soares hateten, komunidade iha postu administrativu Atsabe la asesu informasaun hosi RTTL, ep. Tanba ne’e, Nia husu hasae kapasidade kobertura ba RTTL, ep too iha area rural. Bainhira la hasa’e bazeia ba esperiénsia komunidade nian durante ne’e asesu fali informasaun nasaun viziñu hanesan Indonézia, hanesan rádiu Atambua, kupaun no Sulawesi.

Haree ba preokupasaun komunidade nian, Sekretáriu Estadu Mericio Akara promete katak, Rttl, ep iha prosesu dijitalizasaun tanba ne’e, sei hasa’e liután kapasidade kobertura ba komunidade iha area rural hodi asesu ba informasaun.

Jornalista: Agapito dos Santos

Editór : Manuel Pinto

HUSIK IDA HATÁN