Governu Aprova Rezolusaun Ba Projetu Simentu

0
163
Primeiru-Ministru, Taur Matan Ruak, lidera enkontru Konsellu Ministru, kuarta, (21/9). Imajen António Goncalves

DILI, (TATOLI) – Governu liuhosi reuniaun Konsellu Ministru (KM) estraordináriu kinta ne’e aprova rezolusaun ba akordu sosiál ida ho kompañia Timor Leste Cement hodi aselera prosesu ba implementasaun fabrika simentu iha munisípiu Baukau.

“Konsellu Ministru aprova TL cement nia akordu sosiál, rezolusaun ida hodi halo revisaun ba estatutu projetu cement iha Baukau”, haktuir Ministru Estadu Prezidensia KM, Hermenegildo Pereira, ba jornalista sira iha Palásiu Governu, ohin.

Proposta governu ba Orsamentu Jerál Estadu (OJE) 2019 propoin mós orsamentu milliaun $500 kona-ba partisipasaun Estadu ba investimentu ne’e.

“Governu fó porsentu 40, maibé fazeada. Primeira faze milliaun $150 depois prosesu la’o ba oin hodi fó konfiansa ba ita nia fundasaun ho investimentu ba ita nia rai”, afirma.

Ho aprovasaun rezolusaun ne’e sei aselera prosesu implementasaun projetu hodi loke kampu servisu ba joven sira por-volta 300 iha faze dahuluk, depois kontinua to’o rihun resin.

Entretantu, iha parte seluk KM mós aprova dekretu lei ida hodi atribui saláriu fulan 13 (désimu terseiru) ba funsionáriu públiku iha tinan ikus 2018.

Nune’e mós aprova lei organika ba Ministériu Turizmu Komersiu no Indústria hodi apoiu funsionamentu institusionál.

Jornalista: Agapito dos Santos

Editora: Rita Almeida

HUSIK IDA HATÁN