Austrália Kompromete Hala’o Kapítulu Foun Iha Relasaun Bilaterál Ho TL

0
78
Asistente Ministra ba Dezenvolvimentu Internasionál no Pasífiku hosi Austrália, Senadora Anne Ruston, simu lembransa hosi Prezidente Repúblika, Francisco Guterres Lú Olo, hafoin enkontru ramata. Imajen Mídia PR

DILI, (TATOLI) – Asistente Ministra ba Dezenvolvimentu Internasionál no Pasífiku hosi Austrália, Senadora Anne Ruston, hateten Governu Austrália kompromete atu hala’o kapítulu foun iha relasaun bilaterál ho Timor-Leste (TL).

“Timor-Leste no Austrália hanesan viziñu ne’ebé fahe kompromisu ida ba lei internasionál no sistema internasionál ne’ebé bazea ba regra. Austrália kontinua haree ba oin hodi serbisu hamutuk ho Timor-Leste iha rejiaun”, tenik Ministra Ruston bainhira hala’o enkontru ho Prezidente Repúblika iha Palásiu Prezidente Nicolau Lobato, Bairru Pité, tersa ne’e.

Nia dehan orgullu ho progresu ne’ebé programa dezenvolvimentu Austrália nian halo ba povu Timor sira nia moris no maneira serbisu ne’ebé di’ak entre Austrália no Governu hodi atinji prioridade dezenvolvimentu sira.

“Austrália maka parseiru ida ne’ebé bele tau fiar no efetivu ba Timor-Leste, komprometidu ba prosperidade longu prazu ita-nian”, nia subliña.

Nia hatutan tan: “Ami hakarak haree mudansa kontinuadu iha área saúde, edukasaun no setór agrikultura sira, atu kria tan oportunidade treinamentu sira, atu haforsa feto sira no ajuda diversifika ekonomia no dezenvolve setór privadu”.

Nia katak hein atu simu Prezidente Lú Olo, Primeiru-Ministru, Taur Matan Ruak, no Ministru Negósiu Estranjeiru, Dionísio Babo Soares, vizita ofisiál ba Austrália atu hakbiit liu-tan kooperasaun nasaun rua.

Jornalista: Xisto Freitas

Editora: Rita Almeida

HUSIK IDA HATÁN