Prezidente Repúblika, Francisco Guterres Lú Olo, lansa livru pensamentu Nicolau Lobato ho títulu “Sabemos e Podemos, e Devemos Vencer”, ne’ebé hakerek hosi Pe. Martinho da Silva Gusmão. Imajen Mídia PR

DILI, (TATOLI) – Prezidente Repúblika, Francisco Guterres Lú Olo, lansa livru pensamentu Nicolau Lobato ho títulu “Sabemos e Podemos, e Devemos Vencer”, iha Palásiu Prezidente Nicolau Lobato, Bairru Pité, sesta ne’e.

Livru ne’e hakerek hosi Rev. Padre Martinho da Silva Gusmão no livru ne’e nia konteúdu kona-ba pensamentu Nicolau Lobato liuhusi diskursu, artigu no autobiografia ne’ebé Nicolau Lobato maka prodús.

“Leitura hosi ninia artigu hirak ne’e ita bele hatene dezenvolvimentu reflesaun ba ninia án, oinsá harii Estadu ida no Nasaun ida”, makerek nain liuhusi nia diskursu iha seremónia lansamentu.

Nia esplika livru ida ne’e la ko’alia kona-ba fundadór Estadu, maibé ko’alia kona-ba fundamentu filojófiku polítiku Nicolau Lobato liga ba filozofia liberdade nomós filozofia libertasaun, iha ne’ebé Nicolau Lobato nia prezensa iha luta ba rai sira nian la’ós hakesi de’it ba deskolonializasaun polítika maibé mós deskolonializasaun imperiosidade.

Aleinde ne’e, leigu ne’e haktuir Nicolau Lobato mós iha altura ne’ebá (1974) ko’alia kona-ba barlake. Katak, barlake ne’e la’ós ko’alia kona-ba comprar (sosa) no vender (fa’an) maibé ko’alia kona-ba valorizasaun no dignifikasaun.

Pe. Martinho dehan peskizasaun ba livru ne’e durante tinan tolu (2015-2018) no dadalia mós ho sobrevimente sira iha Governu dahuluk ba Primeira Repúblika (1975) José Ramos Horta, Marí Alkatiri, Rogério Lobato, Abílio de Araújo, hodi haforsa tan referénsia kona-ba Nicolau Lobato.

Livru ne’e pájina 534 no prosesu imprensaun ne’e apoiu husi timoroan balun nomós Amu Martinho rasik.

Enrtretantu, Prezidente Repúblika, Francisco Guterres Lú Olo, sente orgullu ho Amu Martinho nia livru ne’e, tanba konsege hamoris fila fali Nicolau Lobato iha ema hotu nia konsiénsia.

Tuir Lú Olo Nicolau Lobato hatene koñese ninia án rasik no bainhira nia koñese nia án rasik, nia hatene fórmula juizu filozófiku ida para lori orienta povu tomak hodi bele tuir ninia hakarak no ninia polítika.

“Nia (Nicolau) parte hosi realidade konseptuál ida kona-ba Timor-Leste ninian ne’ebé nia halo estudu kle’an molok nia sai hanesan eroi no diriji ema tomak nia hanoin hodi tuir nia hakarak”, katak.

Nia hein katak timoroan sira hotu bele estuda livru ida ne’e ho kontente no onra teb-tebes para bele rekoñese lider boot ida hanesan Nicolau Lobato.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here