Portavóz Alumni FFSU, Faustino Soares

DILI, (TATOLI) – Alumni Fakuldade Filozofia no Siénsia Umana (FFSU), Universidade Nasionál Timor Lorosa’e (UNTL) husu ba Parlamentu Nasionál (PN) promove dialógu persuasivu ho Movimentu Universitáriu Timor-Leste (MUTL) hodi diskute mekanizmu justu ba polítika alineasaun kareta Prado no sosa kareta foun ba deputadu kinta lejislatura.

“Tuir kontestu demokrasia katak polítiku na’in sira presiza konsulta no rona opiniaun públiku depois mak halo lei no halo polítika ne’ebé mak bele ajuda povu nia moris di’ak”, hateten portavós alumni FFSU, Faustino Soares, iha komunikadu imprensa ne’ebé diriji ba redasaun TATOLI, ohin.

Iha komunikadu ne’e nia husu mós ba tribunál atu liberta membru MUTL na’in rua hanesan Moises Magno nu’udar Prezidente Akadémika Estudantil FFSU no Abrão da Costa ne’ebé kumpre tan ona prosesu detensaun iha sela PNTL nian. MUTL nia asaun, nu’udar direitu espresaun sidadaun nian.

Nune’e mós insiste ba bankada parlamentár sira husi terseira lejislatura hanesan bankada Kongresu Nasionál Rekonstrusaun Timor (CNRT-sigla portugé s), Frente Revolusionária Timor-Leste Independente (FRETILIN), Partidu Demokrátiku (PD) no Frente Mudansa presiza hatuur interese povu no nasaun nian aas liu interese individuál hodi kumpri idaidak nia deklarasaun públiku ne’ebé hateten katak eis-deputadu sira sei entrega totalmente kareta Prado ba Konsellu Administrasaun.

Alumni FFSU rekoñese PN nu’udar orgaun lejítimu povu nian, tanba ne’e iha obrigasaun nu’udar sidadaun, labele husik PN sai fatin ida ne’ebé nia povu rasik mak hakilar loron kalan ba kestaun previléjiu no regalias ne’ebé deputadu sira hetan.

Aviza ba parlamentu katak povu Timor-Leste sei enfrenta problema oioin liga ho moris lorloron nian. Inklui, menus ai-han, menus kualidade edukasaun, kualidade saúde no seluk tan.

Atu hasai sofrimentu povu ida ne’e, deputadu sira tenke livre duni husi hakilar, haklalak, povu nian. Nune’e, membru PN kontinua ho integridade no kredibilidade polítika hodi hamriik hamutuk ho povu atu hasai povu husi terus no ki’ak oioin.

Alumni FFSU husu ba povu tomak katak matan moris no neon na’in ba ukun na’in sira ne’ebé kontinua halo lei, hodi benefísia de’it ba grupu ki’ikoan iha Timor-Leste.

Entretantu iha komunikadu ne’e portavós FFSU katak antes ne’e iha 2017 membru MUTL na’in 13 mós hetan detensaun durante oras 72 iha sela mezmu halo asaun ho pasífiku no iha 2018 membru MUTL na’in 22 no ikus  mai 26 novembru, iha tan membru MUTL na’in rua, kumpre tan prosesu detensaun iha sela PNTL no kontinua tuir prosesu primeira interogatória iha tribunál.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here