Primeiru-Ministru, Taur Matan Ruak, hafoin sorumutu ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité. Imajen António Goncalves

DILI, (TATOLI) – Primeiru-Ministru, Taur Matan Ruak, esklarese nia seidauk iha ajenda atu halo remodelasaun ba estrutura Governu Da-ualu Konstitusionál.

“Pur-enkuantu ami seidauk iha ajenda kona-ba ida ne’e. Remodelasaun ne’e imi (jornalista) maka husu ba ha’u maibé ha’u seidauk iha planu ba ida ne’e”, Taur ba jornalista sira iha Palásiu Prezidente Nicolau Lobato, Bairru Pité, kinta ne’e relasiona ho polémika remodelasaun iha semana ikus ne’e.

Xefe Governu katak nia seidauk hatene remodelasaun saida maka sei halo, maibé kuandu kualker  remodelasaun ida akontese nia sei informa ba públiku.

Nia hatutan kuandu remodelasaun ne’e iha, ne’e atividade ida ne’ebé antes ne’e tenke diskute ho instituisaun sira ne’ebé iha interese ba remodelasaun, tanba Governu ida ne’e sustenta hosi partidu lima maka Kongresu Nasionál Rekonstrusaun Timor (CNRT-sigla portugés), Partidu Libertasaun Populár (PLP), Kmanek Haburas Unidade Nasionál Timor Oan (KHUNTO), Uniaun Demokrata Timoroan (UDT) no Frente Mudansa.

“Ita haree saida maka atu akontese maibé agora ne’e espekulasaun de’it ne’ebé ema lansa”, akresenta.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here