Primeiru-Ministru (PM), Taur Matan Ruak

DILI, (TATOLI) – Primeiru-Ministru (PM), Taur Matan Ruak, hatete Timor-Leste batalla maka’as no hakarak rikusoin ne’e (tasi Timor) favorese ba Timor no iha momentu ida ne’ebé favorese hela ba Timor maka timoroan sira kaer soe fali, entaun presiza tetu didi’ak.

“Buat hotu-hotu sempre iha risku. Hanesan mós uluk luta ba ukun án ne’ebé sakrifika ema ba mate maibé ita simu. Tanba ne’e laiha prosesu ida ne’ebé laiha risku. Ema manán tanba barani enfrenta risku no ida ne’e tauk risku nunka manán”, Xefe Governu ba jornalista sira hafoin sorumutu ho Prezidente Repúblika (PR), Francisco Guterres Lú Olo, iha Palásiu Prezidente Bairru Pité, ohin.

Xefe Ezekutivu ne’e dehan atu veta ka promulga proposta alterasaun lei atividade petrolífera ne’e iha PR nia liman.

“Ita ne’e hanesan fó opiniaun de’it. Ami nia opiniaun ne’e Prezidente Repúblika tenke promulga  no sosiedade sivíl hakarak Prezidente veta, maibé desizaun iha Prezidente nia liman tanba ha’u uluk hanesan Prezidente Repúblika entaun ha’u hatene komportamentu Prezidente nian”, afirma.

Kona-ba orsamentu atu sosa asaun (saham) hosi kompañia esploradór petrolíferu, Shell, Taur hatan orsamentu tinan 2019 nian tama iha ona ba Parlamentu Nasionál maka akordu ho Shell ne’e akontese, ne’e duni, kuandu diskusaun iha Parlamenru maka sei haree.

“Só iha Parlamentu maka foin diskute tanba desizaun sosa asaun Shell nian ne’e sai hafoin ami haruka tiha orsamentu ba Parlamentu. Tanba ne’e, durante iha diskusaun maka foin haree katak se iha nesesidade entaun tenke hatama ba orsamentu 2019”, haktuir.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here