Presidenti da Republika Francisco Guterres akompanha husi Komandante Jeral FDTL Lere Anan Timur halao hela pasarevista ba Forsa Defesa Timor Leste wainhira ba visita ba komando FDTL hodi halo enkontru ho ofisiais sira iha Fatuhada, Segunda 10 Juinu 2017.Foto Tatoli/Antonio Goncalves

DILI (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Lere Anan Timor afirma, esforsu povu tomak nian no lider sira nia unidade maka ohin loron lori independénsia mai Timor-Leste.

“Palavra orden “mate ka moris ukun rasik án” nu’udar esforsu hosi povu tomak nó mós lider sira nia unidade maka ohin loron ita bele sai nasaun ida bolu naran Repúblika Demokrátika Timor-Leste (RDTL),” Eis Gerrilleiru ne’e fó sai liafuan ne’e hodi hanoin hikas loron Proklamasaun Independénsia ba dala 43, , hafoin partisipa iha misa Asaun ba Grasa, Igreja Motaél.

Iha fatin hanesan, Prezidente Repúblika (PR), Francisco Guterres Lú Olo, husu timoroan sira hotu fó liman ba malu atu dezenvolve rai ida ne’e (Timor).

“Ita ne’ebé sei moris presiza serbisu hamutuk hodi hakabit ita nia an para bele lori serbí ita nia maluk sira ho domin, pás no estabilidade ho justisa,” Xefe Estadu  husu

Tuir nia katak selebrasaun loron proklamasaun ne’e nu’udar aktu ida atu lembra hikas eroi sira ne’ebé fó isin no ran hodi liberta nasaun ida ne’e.

Entretantu, Pe. Selembrante, Joaquim Sarmento hateten Misa Asaun ba Grasa atu agradese ba Maromak tanba liuhusi Maromak nia kbiit fó enerjia ba timoroan sira atu kontinua kontribui ba dezenvolvimentu iha era independénsia.

“Ita mai agradese la’ós ba de’it independénsia ne’e maibé agradese mós ba buat hotu ne’ebé hatutan ita nia viajen durante tinan 43 nia laran,” nia dehan.

Amu Joaquim informa, atu harii Estadu ida presiza buat oi-oin hanesan rai, lei, Governu, povu, iñu nasionál, bandeira no konstituisaun maibé buat ne’ebé ema presiza loloos maka konxiénsia sosiál.

“Buat ida konxiénsia sosiál nu’udar klamar ida atu harii sosiedade tanba ita hotu kompromete án atu hamutuk harii projetu boot ida naran Estadu,” nia subliña.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here