iklan

NASIONÁL, EKONOMIA

Diretór TL Cement Atualiza Progresu Projetu

Diretór TL Cement Atualiza Progresu Projetu

Primeiru-Ministru, Taur Matan Ruak, simu vizita hosi Diretór TL-Cement, James Rhee, iha Palásiu Governu, ohin, hodi rona preparasaun TL-Cement nian ne’ebé atu halo investimentu simentu iha munisípiu Baukau. Foto GPM

DILI, (TATOLI) – Diretór TL Cement, James Rhee, hasoru Primeiru-Ministru, Taur Matan Ruak, hodi atualiza progresu projetu TL Cement no ko’alia kona-ba loron lansamentu.

“Ohin hau hasoru malu ho Primeiru-Ministru no esplika TL Cement nia situsaun. Ha’u mós hatudu ba nia, ezemplu sira ne’ebé ami halo teste iha Baukau. Iha sesta ne’e ha’u sei ba Baukau para haree kona-ba rai sira, halo preparasaun. Ami mós ko’alia konaba loron atu halo lansamentu primeira pedra”, James relata ohin, iha Palásiu Governu.

Nia dehan loron lansamentu seidauk determina, tanba sei hein desizaun husi governu, maibé tuir nia governu optimista ba projetu ne’e.

“Ha’u haree Primeiru-Ministru iha kompromisu boot ba projetu ne’e, nune’e ami prontu atu hahú. Governu fó tulun maka’as ba projetu TL Cement iha Baukau, ha’u fiar katak projetu ne’e sei hetan susesu boot”, tenik.

Nia informa tan kompañia ne’e hahú fó servisu ba timoroan sira no sei iha treinamentu ba sira ne’ebé la hatene ko’alia inglés atu bele engiñeiru ba kompañia ne’e.

“Servisu hotu sei transparénsia. Sei halo rekrutamentu ba traballadór iha Baukau, hahú ho ema nain 300 no posibilidade sei to’o 1000”, katak.

Entretantu tuir portál ofisiál Governu Timor-Leste ho empreza asina akordu espesiál investimentu projetu TL Cement iha loron 17 maiu 2016.

Governu kolabora ho projetu ne’e liuhusi asinatura akordu investimentu espesiál ida no asinatura “karta intensaun sira ne’ebé la vinkula” atu marka katak futuru Governu bele partisipa iha projetu ne’e.

Fábrika simentu ne’e sei harii besik zona luan ida ne’ebé nakonu ho ahu-ruin (kalkáriu) ho kualidade aas iha rejiaun Baukau nian, no sei halo produsaun ba simentu iha faze báziku fábrika nian (clínquer) ba  esportasaun no simentu ba abastesimentu konstrusaun sivíl iha Timor-Leste.

Komunidade lokál maka sei sai benefisiáriu dahuluk husi projetu ne’e, liuhusi konstrusaun unidade formasaun nian ida. 

Benefísiu sira ba tempu naruk sei aprezenta bainhira Governu hahú ona serbisu ho empreza ne’e no hodi garante kontratasaun traballadór sira iha munisípiu hotu Timor-Leste nian.

Projetu TL Cement ne’e abranje objetivu boot tolu husi Governu kona-ba reforma ekonómika sira hanesan aumenta investimentu privadu, promove diversifikasaun ekonómika no promove empregu sustentavel.

Jornalista: Julia Chatarina

Editora: Rita Almeida

iklan
iklan

Leave a Reply

iklan
error: Content is protected !!