Ambiente konsertu Obbie Messakh iha GMT.

DILI, (TATOLI)-Artista lejendáriu Indonézia ne’ebé koñesidu ho nia knananuk “Kisah Kasih Di Sekolah”, Obbie Messakh, hatete Timor-Leste iha ona progresu barak no espera país ne’e sei dezenvolve tan bá oin, liuliu nia esperansa ba joven sira bele dezenvolve liután iha área múzika nian.

“Ha’u-nia esperansa mak bele dezenvolve bá oin, liuliu ha’u mai iha ne’e hanesan embaixadór múzika no esperansa mak foinsa’e iha ne’e (Timor-Leste) bele hakat bá oin iha parte múzika nian”, katak Obbie hafoin hala’o konsertu Golden Sweet Memory iha Jinájiu Dili, horikalan.

Kantór famozu ne’ebé mai ona Timor-Leste ba daruak, antes ne’e iha 2014 no ba tinan ne’e hatete kona-ba nia konsertu iha Dili ne’e, nia sente kontente no orgullu tebes tanba ho nia idade 62 ne’e sei bele diverte nafatin ema hotu.

“Iha ha’u-nia idade 62 agora ne’e, ha’u sei bele diverte alin sira ne’ebé sei kanta ha’u-nia múzika no ha’u husu obrigadu tanba bele kanta kananuk hamutuk liuliu Kisah Kasih Di Sekolah”.

Obbie konta oinsá mak bele halo múzika Kisah Kasih ne’e katak bazea ba istória reál ne’ebé nia hetan iha 1985. “Ha’u haree labarik estudante sira fila, ha’u tuur iha varanda oin depois ha’u bele hananu, laiha tempu ne’ebé furak liu iha tempu eskola nian, laiha istória ne’ebé furak liu istória domin iha eskola (tiada masa paling indah masa-masa di sekolah, tiada kisah paling indah kisah kasih di sekolah)”.

Ba nia fans iha Timor-Leste, Obbie husu abrigada barak no espera relasaun ne’e kontinua di’ak no daudaun iha mídia Facebook nune’e sira bele hasoru ho malu sira liuhusi ne’e.

Hatán kona-ba entuziazmu timoroan ba nia múzika, artista ne’e afirma nia sente animadu liu tanba ho idade ne’ebé la’ós joven ona ema sei hakarak haree nia, rona nia múzika no nia agradese tanba sei fó ba nia talentu lian ne’ebé furak.

“Ha’u-nia esperansa maski Timor-Leste sai ona nasaun ida, mas ita uluk sai ida no ba ha’u ita maun-alin nafatin”, katak.

Atubele diverte timoroan liuliu atu hanoin fali memória maka Asosiasaun Komersiál Komunidade Xineza Timoroan konvida artista lejendáriu ne’e hodi haksolok ema hotu.

“Ami konvida Obbie Messakh para mai fó hanoin Golden Sweet Memory atu ita hotu hanoin hikas filafali tempu uluk”, afirma vise-prezidente Asosiasaun Komersiál Komunidade Xineza Timoroan, Kathleen Gonçalves.

Aleinde ne’e atu komemora proklamasaun independénsia Timor-Leste nian ba dala-43.

Prezidente Asosiasaun Komersiál Komunidade Xineza Timoroan, Lito Adam, haktuir eventu ne’e realiza tanba Golden Sweet Memory ne’e hanesan ba ema sira ne’ebé idade 40 ba leten, entaun bolu artista ne’e para halibur ema sira ne’ebé gosta rona nia múzika.

Eventu ne’e realiza ho osan U$8000, maibé gasta de’it U$5725 no hetan suporta husi Sekretáriu Estadu Juventude no Desportu, Ministériu Administrasaun Estatálno Ministériu Turizmu, Komérsiu no Indústria.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here