Primeiru-Ministru, Taur Matan Ruak, hafoin sorumutu ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité. Imajen António Goncalves

DILI, (TATOLI) – Primeiru-Ministru, Taur Matan Ruak, husu ba sidadaun hotu atu trata Billete Identidade (BI), tanba governu introdús ona sistema no mekanismu eletróniku ba dokumentu hirak ne’e.

Ezekutivu apela kestaun ne’e ohin, hafoin hamutuk ho espoza Isabel Ferreira renova BI no passporte iha edifisiu Servisu Notariadu Ministériu Justisa Kolmera, Dili.

Ha’u tenki renova,  tanba ita iha mekanismu no sistema foun.  Tanba ne’e husu ba sidadaun hotu para tuir ida ne’e hodi renova ita nia bilete identidade no pasaporte”, hateten Xefe Governu.

Sidadaun hotu presiza hetan tratamentu dignu, tanba ne’e PM husu ba  funsionáriu sira iha notariadu atu atende povu nu’udar liurai.

Governu da-ualu sei esforsu hodi kria kondisaun, liuliu ekipamentu ba funsionáriu sira atu hasae prestasaun servisu.

Entretantu, Ministru Justisa, Manuel Carceres, hateten liuhosi planu orsamentu 2019 tau ona perioridade hodi hadi’a kondisaun, ekipamentu ba servisu notariadu iha nasionál no munisípiu 11 inklui Rejiaun Administrativa Espesiál Ambenu-Oekusi (RAEOA) hodi trata BI, passporte no sertidaun RDTL ba sidadaun.

Fulan sia tan ita boot sira mai uma (notariadu) ne’e sei sai oin seluk, atendementu iha laran la uza ona tripleks maibé uza vidru para transprante ba ema hotu, iha sede munisipál sira ne’e mos sei halo atendementu atu sidadaun labele forma kleur, tanba ne’e servisu ne’e desentraliza hotu ona ba munisípiu”, afirma.

Tuir ministru ekipa movel sei servisu to’o iha área rurál hodi hasai BI ba defisiente no ferik no katuas sira.

Enkuantu, reseita hosi imprimisaun pasaporte ba sidadaun sira to’o fulan ne’e rekolla ona milliaun dolar ida.

“Maibé kuandu hadi’a tiha fatin no kondisaun servisu, sertidaun sira ne’e mos bele selu ona, tanba dekretu lei iha ona depois sei halo diploma ministeriál para estabelese presu maibe folin la aas liu kapasidade povu nian”, katak ministru.

Iha OJE tinan oin, Governu sei sosa ekipamentu imprisaun passaporte, BI no komputadór iha nasionál no munisípiu  sira ho sidadaun barak hanesan Baukau, Bobonaru, Ermera depois kontinua ho sira seluk.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here