Reprezentante Espesiál Timor-Leste, Xanana Gusmão no Prezidente Ezekutiva Shell iha Austrália, Zoe Yujnovich asina Sales and Purchase Agreement, hosi sosa partisipasaun empreza Shell iha konsórsiu kampu Greater Sunrise.

DILI (TATOLI) Empreza petrolíferu Shell asina ona akordu ho Timor-Leste, foin lalais ne’e iha Indonézia, Bali, hodi fa’an nia partisipasaun empreza ho porsentu 26,6 (millaun $300) iha konsórsiu kampu Greater Sunrise ba Timor-Leste.

Akordu fa’an no sosa ne’e asina hosi reprezentante espesiál Timor-Leste, Xanana Gusmão ho Prezidente Ezekutiva Shell iha Austrália, Zoe Yujnovich.

Xanana Gusmão dehan, Timor-Leste apresia vontade Shell ne’ebé atu fa’an partisipasaun iha projetu Greater Sunrise.

“Atitude Shell iha negosiasaun ne’ebé han tempu, hatudu katak empreza ne’e prontu para konsidera la’ós de’it nia interese komersiál sira, maibé mós interese husi nasaun ki’ik sira”, Xanana louva.

Nia elojiu diskusaun aberta sira ho onestidade entre delegasaun parte rua no esklarese katak hanesan parseiru no amigu di’ak.

“Timor-Leste hare, Shell hanesan parseiru no amigu di’ak, ho tempu naruk atu termina relasaun parte rua, tranzasaun ne’e afirma tan ami nia kompromisu ba futuru”, Xanana esplika.

Prezidente Ezekutiva Shell iha Austrália, Zoe Yujnovich hateten katak tranzasaun ho montante millaun $300 ne’e, sei permite parseiru iha konsórsiu sira atu tuir aspirasaun Governu Timor-Leste para dezenvolvimentu Greater Sunrise.

“Ami respeita determinasaun Governu Timor-Leste ne’ebé dezenvolve kampu Greater Sunrise liuhosi unidade onshore Gás Natural Liquefeitu (GNL) iha Kosta Súl. Mezmu nune’e, ami iha ona opiniaun seluk konaba senáriu dezenvolvimentu ne’ebé ótimu, no ami komprende prioridade Governu Timor-Leste no dezeja bele hetan susesu iha konkretizasaun aspirasaun para dezenvolve rekursu importante ne’e iha nasaun”, nia tenik.

“Fa’an interese ne’e, hanesan iha liña ami nia estratéjia global atu transforma Shell ba empreza simples no reziliente liu. Ami nia portfolio australianu kontinua forte hanesan operadór projetu gás natural onshore QGC, Prelude FLNG no pozisaun signifikativa iha projetu Gorgon no North West Shelf LNG North West Shelf GNL”.

Ho ida ne’e mak operasaun fa’an ne’e, inklui ona lisensa husi Shell NT/Rl2 no NT/RL4 iha tasi Austrália no PSC 03-19 no PSC 03-20 iha tasi Timor-Leste, hanesan akordu governasaun asosiadu.

Entretantu  Kampu gás, koñesidu ho naran Greater Sunrise, lokaliza iha kilómetru 150 iha sudeste Timor-Leste no kilómetru 450 iha noroeste Darwin, iha Territóriu Norte.

Iha negosiasaun ne’e, Timor-Leste hetan assisténsia husi PricewaterhouseCoopers (PwC) no Miranda & Associados.

Atu fó hanoin mós katak, antes ne’e iha loron 28 Setembru, Xanana Gusmão no Prezidente ConocoPhillips Australia Osidente, Chris Wilson asina ona akordu atu Governu Timor-Leste sosa ona partisipasaun porsentu 30 ConocoPhillips iha kampu Greater Sunrise ho montante millaun $350.

Parseiru joint venture Greater Sunrise nia mak hanesan Woodside (operadora) ho partisipasaun porsentu 33,4, ConocoPhillips porsentu 30, Shell porsentu 26,6 no Osaka Gas porsentu 10.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here