Primeiru-Ministru (PM), Taur Matan Ruak

DILI (TATOLI)—Primeiru Ministru Taur Matan Ruak hafoin informa ba Prezidente Repúblika, Francisco Guterres Lú Olo kona-bá Empreza Shell fa’an asaun ba Timor, ne’ebé nia akordu reprezentante espesiál Timor-Leste, Xanana Gusmão asina ona iha Bali. Taur promete aban (23/11), Konsellu Ministru (KM) sei  diskute no aprova rezolusaun sosa asaun refere.

Maski nune’e Prezidente Repúblika, seidauk iha desizaun ruma kona ba sosa asaun Shell nian, biar nia rasik hatene ona antes ne’e Timor sosa asaun ConocoPhillips foti osan hosi Fundu petrolíferu.

 “Orsamentu sosa asaun Conoco Philips nian mai hosi Fundu Petrolíferu. Agora, kona-ba Shell nian seidauk iha desizaun ida. Tanba ne’e, ha’u seidauk bele informa ba ita-boot sira (jornalista) katak osan atu sosa ne’e mai hosi fonte ne’ebé, maibé kuandu tempu badak desizaun iha ona talvez ami sei informa ba públiku,” Primeiru Ministru informa ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin enkontru ho Prezidente Repúblika, Francisco Guterres Lú Olo.

Iha soru mutu entre xefe estadu ho xefe governu nian ohin, diskute mós kona ba trajédia Kuluhun (Oknum Polisia tiru mate joven na’in 3), ba ida ne’e Primeiru Ministru dehan, Governu kondena asaun refere no manifesta sentidu kondolénsias ba família matebian nó mós apresia esforsu sivizmu joven sira nian, inklui família tomak nia komportamentu iha tempu difisil ne’e.

“Governu kontinua serbisu hamutuk ho instituisaun PNTL, F-FDTL no instituisaun Estadu sira seluk para evita buat sira hanesan ne’e labele repete tan iha ita-nia nasaun,” Xefe Governu afirma.

Maibé, Taur hameno relasiona ho kazu ne’e buat balun presiza hadi’a iha Polísia Nasionál Timor-Leste (PNTL) laran, liu-liu hanesan regra lori kilat nian. Katak, sirkunstánsia saida maka membru polísia ida presiza lori kilat no hadi’a komportamentu para evita kazu sira hanesan ne’e iha futuru.

Entertantu Shell nu’udar kompañia esploradór ba kampu mina rai Greater Sunrise hamutuk iha Joint Venture ne’ebé ho nia asaun porsentu 28 (28%), ne’ebé Governu Timor-Leste sei sosa ho osan Miloens $300.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here