Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur, hala’o enkontru ho Prezidente Repúblika, Francisco Guterres Lú Olo, kona-ba situasaun seguransa rai laran. Imajen Mídia PR

DILI (TATOLI)–Estadu Maiór Jenerál FALINTIL-Forsa Defeza Timor-Leste (F-FDTL), Lere Anan Timur husu ba komunidade atu konfia nafatin Polisia Nasionál Timor-Leste (PNTL), enkuantu trajédia Kuluhun Baixu ne’e la’ós instituisaun nia sala maibé indivíduu.

“Tiru mate joven na’in tolu no hakanek ema na’in lima iha Kuluhun de Baixu iha domingu (18/11) dadeer, ne’e la’ós instituisaun nia sala maibé indivíduu,” Xefe Estadu Maiór Jenerál, Lere Anan Timur, ba jornalista sira iha Palásiu Prezidente Nicolau Lobato, Bairru Pité, kuarta ne’e.

Jenerál ne’e husu atu komunidade fó nafatin konfiansa ba PNTL no hatutan katak Forsas Armadas sei koopera ho PNTL atu lori nafatin instituisaun ne’e ba oin.

Komandu PNTL tenke responsabiliza katak tenke uza regra hotu-hotu atu julga oknum ne’ebé komete krime, maibé labele hanesan komentáriu sira ne’ebé dehan komandante PNTL tenke rezigna an no halo reestruturasaun.

“Kuandu oknum ida halo sala depois diretamente duni sai malu ne’e mós ita Timor nunka la’o ba oin,” Lere afirma.

Ba PNTL iha futuru mai, Xefe Estadu Maiór Jenerál husu atu labele konfia de’it kilat no uza métodu represaun, maibé presiza halo aprosimasaun, persuazaun no konsensializasaun ba komunidade.

Iha fatin hanesan Nia mós informa, nia parte hato’o ona ba Prezidente Repúblika kona-ba intervensaun Polísia Militár F-FDTL hodi mantein estabilidade hafoin membru PNTL tiru mate joven na’in-tolu no hakanek lima seluk. Intervensaun Polisia Militár F-FDTL nu’udar parte ida atu kontribui ba pás no estabilidade.

“Polísia Militár ne’ebé mantein seguransa hala’o serbisu lahó armada no regra ne’e aplika tiha ona antes, maibé ho akontesimentu membru PNTL tiru joven halo sira reforsa liu-tan prátika ne’e,” Lere esplika.

Entretantu autór ne’ebé hamate juventude na’in tolu no hakanek ema na’in lima iha Kuluhun, ohin parte Tribunál aplika ona Prizaun Preventiva ba sira na’in rua.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here