Membru Parlamentu Nasional. Imajen/dok.TATOLI

DILI (TATOLI) – Parlamentu Nasionál (PN) liuhosi sesaun plenária estraordinária kuarta ne’e, aprova ho unanimidade, votu pezar ba vítima baleadas iha Bairru Kuluhun de Baixo ho votu 59.

Akontesimentu ne’e iha madrugada loron 18 novembru 2018 iha serimónia déslutu, joven sira hetan tiru husi pesoál Polísia Nasionál Timor-Leste (PNTL) hodi rezulta na’in tolu lakon vida no na’in lima kanek.

Liu husi deklarasaun Sekretária Meza Maria Teresinha Viegas, PN espresa votu pezar ba joven na’in tolu ne’ebé lakon vida hanesan, Erick Joni Roberto Bria, Luis Kevin Saldanha Belo no Leonildo Eduardo Ximenes Sequira, no husu Governu no Forsa Seguransa adopta medida nesesária.

“Parlamentu Nasionál kondena atu violénsia ne’ebé husi ajente seguransa kontra joven inosente sira, no apela Governu no Forsa Seguransa atu adopta medida nesesária para evita atu brutalidade sira hanesan ne’e la repete tan”, tenik iha plenária, ohin.

Hanesan konsternasaun ida, Parlamentu Nasionál rona joven na’in tolu lakon vida iha madrugada loron 18 novembru 2018, ne’ebé hanesan vítima ne’ebé hetan tiru entre pesoál Polísia Nasionál Timor-Leste (PNTL), iha serimónia déslutu iha bairru Kuluhun de Baixo.

Hodi hatutan: “Iha momentu triste no konsternasaun ne’e, Parlamentu Nasionál espresa pezar ba joven na’in tolu ne’ebé lakon vida, no enderesa sentidu kondelensa ba família enlutada”.

Xefe Bankada CNRT, Duarte Nunes nu’udar instituisaun ida ne’ebé reprezenta povu iha uma fukun, presiza hato’o sentidu bainhira hetan akontesimentu ne’ebé mak primeira vés akontese iha ita nia rai.

“Ema ho kilat Estadu nia, bele halo lakon ema nia vida, ita hare ba razaun laiha, tanba ne’e mak ami hanoin ita presiza hato’o ita nia sentimentu no solidariedade ba ita nia oan sira ne’ebé mak lakon vida iha loron hirak liubá”, tenik.

Deputada Lídia Norbera husi Bankada Fretilín hateten akontesimentu ne’e mosu husi atu ne’ebé laiha responsabilidade husi parte suspeitu ne’ebé mak halo.

“Kondena ba maluk sira ne’ebé halo atu violénsia ne’e no husu Estadu atu tau atensaun ba  inan no oan kiak ne’ebé mak tanba akontesimentu ne’e, entre matebian na’in tolu ne’e rua hanesan aman”, katak.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here