Diretór Jerál Peskas, Ministériu Agrikultura no Peska (MAP), Acacio Guterres. Foto espesiál.

DILI, (TATOLI) – Diretór Jerál Peska Ministériu Agrikultura no Peska (MAP), Acácio Guterres, informa bazea ba monitorizasaun ne’ebé halo liuhusi satélite hatudu katak prezensa ró ilegál iha tasi Timór (Kosta Súl) hahú husi janeiru to’o novembru 2018 hamutuk unidade 91.

“Ita seidauk bele halo asaun ruma ba atividade ilegál ida ne’e, tanba ita-nia meiu mós lato’o. Ita só informa de’it ba instituisaun relevante sira, komponente navál, marítima, mas to’o ohin loron seidauk iha asaun ruma oinsá atu elimina atividade ne’e”, Acácio informa iha Komoro, ohin.

Sobre kestaun ne’e, Diretór Jerál ne’e relata bainhira MAP halo audiénsia ho Komisaun D Parlamentu Nasionál horisehik hodi aprezenta planu orsamentu ministériu ba 2019, deputadu sira sujere atu ativa fali ró sira ne’ebé durante ne’e fó lisensa para hakail ikan, nune’e bele tau ema peska no parte seguransa no defeza nian para bele kontrola.

“Maibé ida ne’e ita presiza serbisu hamutuk ho instituisaun relevante para haree didi’ak parte seguransa nian depois Parlamentu Nasionál sujere para ita reforsa, liuliu komponente navál iha meiu forte ruma para ró ne’e bele to’o iha parte súl ne’ebá”, katak.

Acácio subliña sobre kálkulu ba ikan ne’ebé lakon iha tasi-mane ne’ebé diresaun halo maizumenus hamutuk millaun $250 resin.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here