Bandeira Timor-Leste

DILI, (TATOLI) – Governu aloka orsamentu rihun $200 hodi komemora tinan 43 proklamasaun independensia RDTL ba 2018.

Hosi montante ne’e rihun $56 aloka ba munisípiu 11 no postu administrativu 61, la inklui munisípiu Dili no Rejiaun Administrativa Espesial Oekusi Ambenu (RAEOA).

Vise-Ministru Administrasaun Estatál
Abílio José Caetano. Imajen Egas Cristovão

“Munisípiu Dili selebra iha nasionál. RAEOA iha orsamentu ketak hosi RAEOA, ba selebrasaun iha Dili hamutuk rihun $143”, katak Vise Ministru Administrasaun Estatál, Abílio José Caetano, ba jornalista sira iha Palásiu Governu, ohin.

Ho limitasaun orsamentu neébé governu hasoru, selebrasaun tinan ne’e ho misa agradesimentu neébé sei hala’o iha loron 27 iha parokia Motael no 28 novembru seremonia isar bandeira.

“Governu laiha atividade, depois seremonia governu prepara koktail ida ba bainaka sira iha resintu parlamentu”, dehan governante ne’e.

Prezidente Repúblika, Francisco Guterres Lú Olo, maka sei sai inspetór ba seremonia dada bandeira iha Palásiu Governu, enkuantu membru Governu sira destaka ba munisípiu 11.

Ba tinan ne’e, governu la konvida bainaka espesiál sira hosi rai liur, maibé konvida de’it embaixadór akreditadu 18 iha TL, organizasaun internasionál no seluk tan.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here