Aeroportu Prezidente Nicolau Lobato, Comoro, Dili. Imajen/Google.

DILI, (TATOLI) – Primeiru-Ministru, Taur Matan Ruak, fó ona orientasaun ba Ministru Transporte no Komunikasaun hodi aselera prosesu estudu viabilidade ba projetu konstrusaun Aeroportu Internasionál Nicolau Lobato ne’ebé sei gasta orsamentu milliaun $70 resin.

Hosi montante ne’e, Governu Japaun iha ona kompromisu apoiu milliaun $42 enkuantu restu sei responsabiliza hosi Governu.

“Governu Japaun apoiu milliaun $42. Porvolta 70 milloen itál, maibé governu Japaun apoiu $42 restu governu maka tau”, haktuir Ministru Transporte no Komunikasaun, José Agostinho da Silva, ba jornalista sira iha Palásiu Governu, ohin.

Mesmu prevee ona orsamentu ba konstrusaun, maibé governu sei halo estudu viabilidade antes ba implementasaun.

“Ministériu ne’e iha ona planu hodi prevee orsamentu hodi halo estudu viabilidade para aselera planu ba konstrusaun aeroportu internasionál iha tempu badak”, hateten ministru hosi partidu KHUNTO (Kmanek Haburas Unidade Nasionál Timor Oan) ne’e.

Tuir nia estudu viabilidade importante hodi la afeita ba prosesu implementasaun. Maibé Governante la esplika detallu kona-ba data implementasaun ba konstrusaun aeroportu internasionál ne’e.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here