Prokuradór Jerál Repúblika (PJR), José da Costa Ximenes

DILI (TATOLI)—Prokuradór Jerál Repúblika (PJR), José da Costa Ximenes, hato’o ba Prezidente Repúblika, Francisco Guterres Lú Olo, kona-ba atividade Ministériu Públiku (MP) ba tinan 2018 no 2019 nian.

“Enkontru ohin ita informa ba Prezidente Repúblika kona-ba atividade hotu-hotu ne’ebé iha relasaun ho serbisu Konsellu Superiór Ministériu Públiku nian,” José Ximenes ba jornalista sira iha Palásiu Prezidente Nicolau Lobato, Bairru Pité, sesta ne’e.

Atividade MP ba tinan 2018 nian ne’ebé Prokuradór Jerál relata maka prosesu inspesaun extraordináriu, simu majistradu foun pelumenus na’in lima ne’ebé agora hahú dadauk ona faze prátika.

Ba atividade tinan 2019 nian, Ximenes hatutan, inspesaun ordinária ba majistradu na’in ualu ne’ebé kompleta ona tinan tolu serbisu, iha planu atu halo formasaun ba kargu sekretaria sira iha Ministériu Públiku para bele priénse kargu difinitivamente tanba sekretaria sira iha distritál agora ho nomeasaun interina de’it.

Aleinde ne’e, nia afirma, iha tinan 2019 mós MP sei halo inspesaun ba prokuradór na’in lima ne’ebé kompleta ona tinan haat para bele pasa ba primeira klase ka lae no Konsellu Superiór Ministériu Públiku mós aprova ona oinsá atu harii prokuradoria ida iha Lautem nomós harii Gabinete Sentrál Kombate Korupsaun no Kriminalidade Organizada.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here