Komandante Jerál Polísia Nasionál Timor-Leste (PNTL), Komisáriu Júlio da Costa Hornay

DILI, (TATOLI) – Komandante Jerál Polísia Nasionál Timor-Leste (PNTL), Júlio da Costa Hornay, aprezenta atuasaun polísia ba Movimentu Universitáriu Timor-Leste (MUTL) ne’ebé akontese iha Dili laran ba Prezidente Repúblika, Francisco Guterres Lú Olo.

Tuir parte PNTL atuasaun ne’e tanba viola regra manifestasaun bainhira halo asaun kontra Parlamentu Nasionál sosa kareta PRADO.

Júlio esplika lei númeru 1/2006 hateten sé de’it maka halo manifestasaun tenke iha distánsia metru 100 hosi edifísiu orgaun soberania hanesan Parlamentu Nasionál, Palásiu Governu, Palásiu Prezidente no Tribunál Rekursu.

“Artigu 7 hosi lei manifestasaun ninian hateten kuandu manifestante viola regra, autoridade seguransa iha podér interven. Ida ne’e maka ita halo. Ita la halo arbiru”, afirma Hornay ba jornalista sira iha Palásiu Prezidente Nicolau Lobato Bairru Pité, sesta ne’e hafoin enkontru ho Xefe Estadu.

Nia hatutan: “Iha tempu ne’ebá ita fó avizu ona katak labele sees hosi distánsia metru 100 maibé manifestante sira lakohi. Tanba ne’e maka polísia halo atuasaun”.

Kona-ba kestiona atuasaun PNTL ba MUTL, nia hatán, sé de’it iha direitu atu bele kestiona maibé lia loos ne’e iha tribunál. Katak, tribunál maka bele deside atuasaun ne’e loos ka sala.

Hornay haklaken estudante hosi MUTL na’in 22 ne’ebé polísia detein livre ona hosi sela polísia maibé ho kondisaun Termu Identidade Rezidénsia (TIR).

Entretantu, Hornay tenik Prezidente Repúblika en-prinsípiu mantein lei ne’ebé vigora iha nasaun ne’e hanesan asuntu arte marsiais mantein lei númeru 5/2017 dezde seidauk iha lei foun ida atu substitui lei refere.

Nune’e mós lei númeru 1/2006 ko’alia kona-ba manifestasaun, polísia mantein lei ida ne’e hodi hala’o serbisu no karik viola lei hirak ne’e polísia iha devér atu halo atuasaun.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here