FOTO GPM

DILI (TATOLI) – Majór Jenerál Ezérsitu Estadus Unidus Amérika (EUA), Suzanne Vares-Lum hosi Komandu Indo-Pasífiku (INDOPACOM), hasoru malu ho Xefe Governu, Taur Matan Ruak hodi ko’alia kona-ba reforsu relasaun bilaterál entre nasaun rua ne’e iha área seguransa nian.

“Ami hasoru malu ho Primeiru Ministru, Taur Matan Ruak ho Ministru Defeza atu ko’alia kona-ba reforsu relasaun bilaterál entre Estadus Unidus ho Timor-Leste iha área seguransa nian,” INDOPACOM, Major Jenerál Ezérsitu EUA Suzanne Vares-Lum ba jornalista sira iha Palásiu Governu, Horisehik.

Iha enkontru ne’e mós,  Majór Jenerál Ezérsitu EUA Suzanne Vares-Lum husi Komandu Indo-Pasífiku (INDOPACOM) informa ba Primeiru Ministru, Taur Matan Ruak kona-ba eventu diálogu bilaterál defeza entre Timor-Leste-EUA ne’ebé hala’o iha kuartél jerál Falintil-Forsa Defeza Timor-Leste (F-FDTL), horisehik.

Hanesan nasaun demokrátiku kompartilla interese atu promove lei no orden inklui direitus umanus, Estadus Unidus no Timor-Leste hala’o diskusaun kle’an konaba relasaun forte entre nasaun rua, kooperasaun atu asegura Indo-Pasífiku ida ne’ebé livre no nakloke ba ema hotu no hametin liu tan kooperasaun, partikularmente iha área asisténsia umanitária no apoiu ba dezastre naturál.

Entretantu, eventu ida horisehik ba dala sia nian, ne’ebé sei kobre pasu estratéjiku ba futuru hanesan EUA nia estratéjia ba Indo-Pasífiku, Progresu Programa Parseria EUA, Seguransa Marítima, Kooperasaun Seguransa no Planu Interkámbiu sira, Kooperasaun bilaterál no multilaterál Timor-Leste ho EUA nian ba formasaun no ezersísiu militár sira inklui Programa lian Ingles F-FDTL nian.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here