Prezidente KI, Virgilio da Silva Guterres, bainhira partisipa kongresu internasionál komunikasaun iha Universidade Coimbra, Portugal. Imajen KI

PORTUGAL, (TATOLI) – Prezidente Konsellu Imprensa (KI), Virgílio da Silva Guterres, partisipa kongresu internasionál ba komunikasaun, jurnalizmu no espasu públiku ba dala lima durante loron rua hahú 13 to’o 14 fulan-ne’e iha universidade Coimbra, Portugal.

Tuir nota komunikadu ne’ebé Tatoli simu hosi KI haktuir eventu ne’ebé organiza hosi Sentru Estudu Interdisiplinár Sékulu XX, CEIS 20, Universidade Coimbra kompostu hosi sesaun plenária no paralela ho diskusaun asuntu Étika no Deontolojia Jornalízmu iha Espasu Luzófonu.

Tópiku sira ne’ebé sai matéria diskusaun mak dezafiu no prátika profisaun, étika no deontolojika jurnalizmu, regulamentu informasaun no responsabilidade jornalista.

Oradór importante sira iha kongresu ne’e mak profesór Diogo Aurélio hosi Universidade Nova Lisboa, profesór Hugo Aznar hosi Universidade CEU Cardenal Herrera, Valencia (España), profesór Carlos Camponez hosi FLUC no akadémiku seluk hosi nasaun lusofonia hanesan Brazil, São Tomé e Príncipe, Cabo Verde no Mocambique.

Prezidente KI hola parte iha sesaun plenária daruak ho intervensaun kona-ba kodigu étika, regulamentu no kompromisu profisionál.

Virgílio da Silva Guterres iha intervensaun fahe esperiénsia no prosesu adopsaun kode étika jornalístika iha Timor ne’ebé hahú iha 1999 liu hosi estabelesimentu Asosiasaun Jornalista Timor Lorosa’e (AJTL), iha otel Turizmu, kongresu nasionál jornalista iha 2013, no aprovasaun kode étika iha 2016 hosi KI.

Virgílio deskreve ezisténsia KI nu’udar mekanizmu regulasaun ba komunikasaun sosiál ho papél supervizór, mediadór no fiskalizadór.

Partisipa iha kongresu ne’e estudante timoroan na’in tolu ne’ebé estuda iha área jurnalizmu no komunikasaun, fakuldade letra universidade Coimbra.

Estudante sira ne’e mak Clara Salomea (hosi munisípiu Kovalima), Júlio Afonso (Likisa) no Agostinho Alves (Manatutu). Sira hahú estudu iha Universidade Coimbra iha 2014 no 2015.

Eventu ne’e remata ho asina akordu kooperasaun entre instituisaun akadémika, sentru formasaun profisionál no orgaun reguladór komunikasaun sosiál hosi nasaun luzofonia nian atu harii rede Lusófona ba kualidade informasaun.

Asinante akordu ne’e hamutuk 16, inklui Universidade Coimbra, Institutu Superiór siénsia sosiál no polítika (ISCSP-sigla portugés), Universidade Lisboa, Universidade Saun José (Makau), Sindikatu Jornalista Portugal, ERC Portugal, KI TL, Universidade Cabo-Verde, Universidade Lusófona Guiné, Komisaun ba Karteira Profisionál Jornalista Portugal, Universidade Federál Santa Catarina (UFSC), Brazil, Rede Nasionál ba Observatóriu Imprensa, Brazil, no seluk tan.

Asinatura akordu hala’o iha salaun Reitoria Universidade Coimbra ho prezensa Reitór Universidade, Eng. João Gabriel Silva.

Ho asina akordu ne’e, KI sai ona membru ba plataforma boot rua komunikasaun sosiál nian. Iha 2016, iha Bissau, kapital Guiné-Bissau, KI sai membru ba Plataforma Entidade Reguladór (PER), ba komunikasaun sosiál hosi nasaun sira ho lian-portugés. (nota imprensa)

HAKEREK NO HATÁN

Please enter your comment!
Please enter your name here