Ministru interiór interinu atual Ministru Defesa, Filomeno Paixão. Imajen: Antonio Goncalves

DÍLI,(TATOLI)-Ministru Defeza no Seguransa, Filomeno Paixão informa, governu da ualu propoin ona orsamentu iha OJE 2019 hodi investe makaas liután ba instituisaun polísia rua ne’e; Tránzitu ho migrasaun, tanba tuir governu nia haree seksaun rua ne’e mós hola papél importante ba nasaun, liu-liu kobra mós reseita ba kofre estadu liuhosi kobransa ba infrasaun transporte públiku no movimentu sidadaun estranjeiru iha rai laran.

“Iha orsamentu 2019, governu propoin ona osan atu investe iha seguransa rodoviariu no investe tan iha migrasaun, tanba uluk ladún iha investimentu agora ita investe,“ Filomeno Paixão informa nia ba jornalista sira iha Palásiu Governu Dili, ohin.

Iha seksaun Tránzitu sei aumenta númeru tránzitu iha kapitál nasaun tanba oras née pesoál menus hosi atus ida susar atu kontrolu movimentu iha Estrada públiku.

Migrasaun oinsá atu monta polisia migrasaun iha ita nia konsuladu ba nasaun sira ne’ebé nia ema tama timor barak liu, para antes sidadaun sira née tama mai , migrasaun rekere kedas visa turista ou trabalhu.

Alende ne’e,  sei dezenvolve di’ak liután polísia Komunitária tanba tuir planu estratéjiku 2011-2030 ho konseitu estratéjiku defeza no seguransa.

Iha parte seluk  Ministru Defeza no Seguransa, Filomeno Paixão hateten, Governu sei implementa polítika kaderizasaun ba instituisaun Polisia Nasionál Timor Leste iha Dezembru 2018. Ba asuntu ne’e Ministru defeza informa ona ba Presidente  katak reeve misaun no prosesu kaderizasaun ba polísia halo hanesan F-FDTL nian.

Ofisais Polísia tenke remata kursu ofisiais ou pelu menus graduadu estrata-1 (S1), enkuantu sekundária bele asume de’it diviza to’o sarjentu hodi nune’e bele iha vizaun no responsabilidade ba dezenvolve instituisaun.

 Jornalista : Agapito dos Santos

Editór : Manuel Pinto

HAKEREK NO HATÁN

Please enter your comment!
Please enter your name here