Primeiru-Ministru (PM),Taur Matan Ruak

DILI, (TATOLI) – Primeiru-Ministru, Taur Matan Ruak, hateten dadaun ne’e Governu ezekuta ona Orsamentu Jerál Estadu (OJE) 2018 ho pursentu 75.

“Ne’e di’ak loos tanba orsamentu 2018 nian ne’e ba fulan haat maibé setembru ba tiha duo-désimu, entaun ezekuta fulan tolu nian de’it”, Xefe Ezekutivu ne’e ba jornalista sira iha Palásiu Prezidente Nicolau Lobato, Bairru Pité, kinta ne’e hafoin informa atividade Governu ba Xefe Estadu, Francisco Guterres Lú Olo.

Nia esplika iha nível infraestrutura nian kuaze ezekuta pursentu 60, maibé ida ne’ebé demora liu maka parte sosiál hanesan selu katuas no ferik sira.

“Ba situasaun ita nian maske estrutura Governu la kompletu, preokupa ba orsamentu duo-desimu, orsamentu jerál 2018 no 2019, maibé ezekusaun orsamentu 2018  hatudu pasu ida pozitivu”, tenik Xefe Governu.

Taur haktuir governasaun sira anterior nian maske la’o iha tempu ne’ebé normál, maibé dalaruma ezekuta de’it pursentu 80 no barak liu to’o de’it pursentu 90.

Kona-ba lista kandidatu membru Governu ne’ebé sei pendente, nia hatán kontinua ko’alia ho Prezidente Repúblika no lider sira ne’ebé iha ligasaun ho asuntu sira ne’e para ultrapasa.

“Laiha dalan seluk tenke hamutuk tanba ita-nia objetivu maka sidadaun nia di’ak no estabilidade nasaun”, Taur dehan no hatutan katak aseita ho mudansa polítika foun ruma mosu, importante fó benefísiu ba Timor.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here