Prezidente Parlamentu Nasionál (PN), Arão Noé de Jesus, ko’alia ba jornalista sira iha Palásiu Prezidente Nicolau Lobato, ohin. Imajen Ajénsia Tatoli/Xisto Freitas

DILI (TATOLI)—Prezidente Parlamentu Nasionál (PN), Arão Noé de Jesus, konsulta hikas ho Prezidente Repúblika, Francisco Guterres Lú Olo, atu reajenda iha plenária kona-ba viajen Xefe Estadu ba Vatikanu ne’ebé antes ne’e maioria membru Parlamentu Nasionál vota kontra.

“Bankada AMP husu atu reajenda dezlokasaun Prezidente Repúblika ba Vatikanu. Ida ne’e maka ohin ha’u mai enkontru ho Prezidente Repúblika atu rona nia desizaun, maibé Xefe Estadu dehan desizaun ne’ebé Parlamentu foti tiha ona ne’e maka vale. Hafoin desizaun ne’e, Prezidente Repúblika haruka tiha ona karta ba Santa-Sé katak Xefe Estadu nia viajen kanseladu,” Arão ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin enkontru ho Xefe Estadu.

Kona-ba tanbasá reajenda dezlokasaun Xefe Estadu ba Vatikanu, nia hatán, kestaun ida ne’e labele husu ba nia maibé husu ba líder bankada sira tanba sira (líder bankada sira li-liu bankada AMP) maka sujere atu reajenda.

“Ha’u Prezidente Parlamentu ne’e nu’udar jestór. Líder bankada sira propoin mai meza katak bele tau ba iha ajenda ka lae ne’e deside iha plenária. Agora tanbasá maka reajenda ne’e labele husu ba ha’u maibé husu ba líder bankada sira no sira ne’ebé husu sujestaun,” nia esplika.

Jornalista: Xisto Freitas

Editór : Manuel Pinto

1 KOMENTÁRIU

  1. Politika palhassada AMP nian mak ida ne’e duni. Hau fiar katak sei la kleur. Kontra to’o nebe’e mos temppu sei to’o. Baikote Viagem Nai PR Dr. Lu Olo nian ba Vaticano depois lori fali rebusadu Veneno ba hamaus PR. Ida ne’e maka Arao buka dalan la hetan.

HAKEREK NO HATÁN

Please enter your comment!
Please enter your name here