DILI (TATOLI) – Parlamentu Nasionál (PN) ohin, liuhosi sesaun plenária fó votu pezar ba falesimentu Andre da Costa Belo “L4” unanimidade, ho votu 55.

“Iha tempu ne’e, Parlamentu Nasionál espresa votu pezar ba falesimentu Andre da Costa Belo L4, no fó sentidu kondolénsias ba nia kaben, oan, maun alin sira no família enlutada”, deklarasaun PN liuhosi Sekretária Meza, Maria Teresinha.

L4 lakon vida iha loron 12 novembru 2018 iha Díli ho idade 61, Andre da Costa Belo ho naran kódiku“L4” moris iha aldeia Laodae, suku Atelari postu administrativu Laga munisípiu Baucau iha loron 12 maiu 1957, oan husi Rana Ono no Wewe Noko.

Iha tempu okupasaun Indonézia nia luta ho forma destemida kontra forsa inimiga no okupa pozisaun fulkrál iha rezisténsia timoroan nian.

Entre tinan 1976 to’o 1977, L4 hanesan komandante seksaun iha komandu zona Laga. Nune’e mós entre 1977 to’o 1979 sai hanesan komandante sesaun iha setór Ponta Leste iha área Ililiu.

Iha tinan 1981, hetan kapturasaun husi forsa Indonézia no detidu to’o tinan 1983, iha loron ne’e dezloka kedan ba Díli no reativa fali ligasaun ho Frente Armada iha biban organizasaun guerilla Sagrada Família ho orientasaun husi Komandante L7.

Hafoin restaurasaun Independénsia Andre da Costa Belo kompleta estudu iha fakuldade Siénsia Polítika iha Universidade Díli (UNDIL).

Hafoin kompleta nia estudu, nia hetan nomeasaun hanesan vise reitór, hanesan kargu ne’ebé nia okupa to’o nia mate.

Alende nia karreira akadémika, nia mós hanesan impulsionadór ba prátika desportiva entre joven husi klube futebol Aitana, ne’ebé nia rasik lidera.

Iha tinan 2006, sai hanesan fundadór partidu polítiku UNDERTIM no asume kargu vise prezidente no iha tinan 2016, sai hanesan fundadór Partidu Libertasaun Popular (PLP).

Entre tinan 2017 to’0 2018, nia integra iha VII Governu Konstitusionál ne’ebé nia asume kargu hanesan Sekretáriu Estadu Assuntus Veteranus.

Hanesan veteranu ba libertasaun nasionál no independénsia Timor-Leste, Andre da Costa Belo ho nia karakter korajozu, empeñu no dedikasaun durante nia vida.

Jornalista: Julia Chatarina

Editór : Manuel Pinto

 

HAKEREK NO HATÁN

Please enter your comment!
Please enter your name here