MNEK ho reprezentante liña ministeriál sira. Foto TATOLI: Rafy Belo

DÍLI, (TATOLI)-Governu Timor-Leste, liuhusi Ministériu Negósiu Estranjeiru no Kooperasaun (MNEK) hamutuk ho liña ministeriál realiza workshop ba loron rua; hahú ohin no ramata aban, hodi ko’alia kona-ba validasaun TLAMP (Timor-Leste ASEAN Mobilization Program) hodi koordena serbisu, buka prienxe rekezitu ASEAN (Association of Southeast Asian Nation).

Diretór Jerál Asuntu ASEAN, Jorge Camões informa katak kuaze tinan ida MNEK ho BDA (Banku Dezenvolvimentu Áziatiku) la’o ba ministériu sira hotu no rekolla informasaun kada ministériu kona-ba oinsa no haree keta ministériu sira iha dezafiu no haree mós lei orgániku ministériu nian, atu dezenvolve hodi prienxe TLAMP ne’ebé mak ita iha.

“Ami bolu hamutuk ministériu sira atu haree fila fali saida mak iha ona, saida mak sei kuran, atu nune’e ita bele koordena ita-nia serbisu di’ak liután. Liliu, relasaun ho preparasaun ita nian ba ASEAN. Ita tenke konsolida ita-nia aan internamente molok sai ba li’ur. Valida fila fali traballu sira ne’ebé mak halo tiha ona durante ne’e,” informa Diretór Jorge Camões ba jornalista sira, iha MNEK, Praia dos Coqueiros-Díli, ohin.

Diretór Jorge Camões mós akresenta katak rekomendasaun, sujestaun no hanoin sira ne’ebé mak reprezentante inter-ministeriál sira hato’o nu’udar rekomendasaun inisiál ida no depois sei fó sai rekomendasaun kumpletu hafoin workshop ne’e.

Maibé, tuir diretór ne’e, depois enkontru pelumenus iha grupu traballu, bazea ba pilár ASEAN ninian (polítika no seguransa, ekonómia no sósiu-kulturál) atu nune’e liña ministerial hothotu, setór privadu no ema hotu ne’ebé interesadu bele envolve iha grupu traballu ne’e.

“Depois grupu traballu iha ne’ebá, idaidak diskute, haree, halo planu, para nune’e atu bele responde ba aejizénsia ema nian i atu nune’e mós atu identifika I prienxe buat balun ne’ebé sei kuran hodi prepara aan di’ak liu hodi antesipa desizaun ASEAN ninian kona-ba ita-nia integrasaun,” esplika Diretór Jerál Asuntu ASEAN, Jorge Camões.

Iha fatin hanesan, diretora ba Asuntu Ekonomia MNEK, Milena Rangel, perante partisipante sira, halo mós aprezentasaun kona-ba preparasaun Timor-Leste hodi sai membru ba ASEAN.

Inklui, husi ABD, aprezenta husi reprezentante Edmund. W. Sim kona-ba ASEAN Legal Comitments.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here