Primeiru-Ministru, Taur Matan Ruak prezide reuniaun iha Konsellu Ministru.

DILI (TATOLI) – Ministru Estadu no Prezidénsia Konsellu Ministru, Agio Pereira hateten reuniaun Konsellu Ministru (KM) aprova ona adjudikasaun estrada Baukau-Vikeke atu hahú ona hanesan atualizasaun no manutensaun.

“Komisaun Nasionál Aprovizionamentu (CNA-sigla portugés) halo ona servisu kleur no konklui ona, nune’e mós Banku Dezenvolvimentu Aziátiku (ADB-sigla ingles) hola parte iha finansiamentu, fó ona aprovasaun no aprezenta ona ohin iha Konsellu Ministru”, tenik ohin ba jornalista sira, hafoin reuniaun ezekutivu.

Iha biban hanesan Agio Pereira rejeita esplika detallamente monetante orsamentu hodi rehabilita estrada basa nia konsidera prosesu ne’e sei sensivel, tanba ne’e so CAN mak iha informasaun kona ba ida ne’e.

Entretantu, estrada Baukau liga Vikeke hamutuk 169km fahe ba sesaun 5 mak hanesan Baucau-Laga 20km, Laga-Com 59km, Lautem-Lospalos 27,8km, Baucau-Venilale 26km, no Venilale-Vikeke 35km.

Iha fartin hanesan Agio informa, KM mós, ohin aprova dekretu lei subsídiu alimentasaun ba funsionáriu diresaun nasionál seguransa patrimóniu públiku, bazeia ba desizaun ne’ebé KM aprova iha tinan 2013; katak, kada fulan funsionáriu sira hetan osan $30 ba alimentasaun, maibé ohin aprova hodi sa’e ba $70.

Nune’e mós KM aprova lei orgánika Ministériu Interior (MI), Ministériu Solidariedade Sosiál no Inkluzaun (MSSI), Ministériu Agrikultura no Peska (MAP) no Sekretáriu Estadu Igualdade no Inkluzaun (SEII).

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here