Helder da Costa. Foto espesiál

DILI (TATOLI) – Sekretáriu Jerál G7+, Helder da Costa, informa Estadu Vatikanu rekoñese papél G7+ tanba lori pás no dame iha mundu. Ida ne’e, afirma Timor-Leste nu’udar nasaun ki’ik, maibé fuan boot.

“Ita nu’udar  nasaun ki’ik maibé ita nia fuan boot, ita ajuda nasaun hirak ne’ebé iha konflitu laran, liuliu Repúblika Sentrál Afrikanu, ita konsege lori dame no pás, Vatikanu rekoñese ida ne’e,” Helder da Costa ba jornalista sira hafoin partisipa iha Konsellu Ministru hodi aprezenta servisu, iha Palacio Governu, ohin.

Helder da Costa, konta Vatikanu rasik apresia tebes papél Timor-Leste nian liuhosi organizasaun G7+ hodi lori dame no pás iha nasaun hirak ne’ebé hetan konflitu hanesan Guinea Bissau, Liberia, Repúblika Sentrál Afrikanu no seluk tan.

“Ida ne’e ita tenke orgullu mai ita timoroan sira, ita mezmu nasaun ki’ik, maibé ita konsege halo pás iha rai seluk.”

Nia mós rekoñese, Timor-Leste sempre iha konflitu, iha instabilidade laran, maibé daudaun ne’e ita hanesan nasaun ne’ebé hadomi pás.

Hirak ne’e hotu akontese tanba organizasaun G7+ ajuda  Ministériu Negósiu Estranjeiru no Kooperasaun halo diplomasia, halo advokasia.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here