Prezidente Fundasaun Ázia, David Arnold, entrega rekordasaun, fotografia, ne’ebé delegasaun Fundasaun Ázia hasai hamutuk ho Prezidente Francisco Guterres Lú Olo, iha tinan 2001, bainhira atuál Xefe Estadu asumi kna’ar hanesan Prezidente Asembleia Konstituante. Imajen Mídia PR

DILI (TATOLI)— Prezidente Fundasaun Ázia, David Arnold, ho nia delegasaun relata ba Xefe Estadu, Francisco Guterres Lú Olo, kona-ba serbisu sira ne’ebé fundasaun ne’e halo.

Iha biban ne’e, delegasaun refere mós husu Prezidente Francisco Guterres nia hanoin oinsá Fundasaun Ázia bele kontribui di’ak liu hodi apoiu povu Timor-Leste.

Xefe Estadu agradese apoiu tomak ne’ebé fundasaun ne’e fó ba Timor-Leste dezde independénsia liuhusi programa Auditória Sosiál, Polisiamentu komunitáriu, hakbiit-feto no sel-seluk tan ne’ebé importante tebes ba Timor-Leste ninia dezenvolvimentu.

“Ha’u husu nafatin fundasaun ne’e nia apoiu liuhusi kooperasaun ho Governu Timor-Leste, atu hakbiit povu oinsá halo kontrolu sosiál, apoiu Programa Governasaun di’ak, programa kontra violénsia, Programa hakbiit feto no dezenvolvimementu turizmu iha rai-laran,” tenik Xefe Estadu liuhusi enkontru ho delegasaun Fundasaun Ázia iha Palásiu Prezidente Nicolau Lobato, Bairru Pité, tersa ne’e.

Atu programa sira fundasaun nian bele hetan susesu, tuir Lú Olo, presiza halo bebeik avaliasaun hodi identifika dezafiu sira no hetan solusaun ba problema sira ne’ebé infrenta.

Maibé, nia rekoñese katak Timor-Leste mós presiza prepara nia-án liuhusi investimentu iha setór edukasaun, tanba programa sira ne’ebé bele hakbiit povu hodi dezenvolve nia moris.

“Importante tebes Estadu kria kondisaun atu povu bele akompaña no prepara nia-án hodi involve iha prosesu dezenvolvimentu nasaun nian,” Prezidente Repúblika informa.

Nia hateten Fundasaun Ázia bele konta ho nia apoiu, liu-liu oinsá atu halo avaliasaun ba implementasaun programa sira fundasaun nian iha Timor-Leste.

Molok hahú enkontru ho Xefe Estadu, Prezidente Fundasaun Ázia, David Arnold, entrega rekordasaun, fotografia, ne’ebé delegasaun Fundasaun Ázia hasai hamutuk ho Prezidente Francisco Guterres Lú Olo, iha tinan 2001. Iha tempu ne’eba, atuál Xefe Estadu, asumi kna’ar hanesan Prezidente Asembleia Konstituante.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here