Ministru Transporte no Komunikasaun, José Agustinho da Silva halo enkontru ho operadór aviaun Sriwijaya, Nam Air no Citilink hodi koalia konaba folin bilhete aviaun mak ikus mai sa'e. Imajen: Media MTK

DILI (TATOLI) –Ministru Transporte no Komunikasaun, José Agostinho da Silva informa; operadór aviaun iha Timor-Leste klarifika ona ba governu katak, aumentu ba folin billete aviaun nian, impaktu mai hosi folin aftur no dolar  ne’ebé as, inklui númeru pasajeiru mós aumenta.

“Horisehik ha’u konvida sira (operadór Sriwijaya, Nam Air no Citilink) urjente hodi ko’alia konaba folin billete aviaun ne’ebé sa’e no sai preokupasaun públiku. Sira fó razaun tanba mina ba aviaun (aftur) nia folin iha merkadu mundu sa’e (ministru la esplika klaru folin sa’e ba hira), operadór tolu ne’e husi indonézia enkuantu valor osan rupiah ne’e monu bainhira troka ho dolar, no ikus liu tanba  númeru pasajeiru aumenta (demanda merkadu aumenta),” Ministru José esplika ba jornalista sira ohin.

Nune’e nia dehan, durante ne’e Governu liuhosi Administrasaun Aviasaun Sivíl Timor-Leste (AACTL-sigla portugés) mak halo akordu ho operadór aviaun sira konaba folin billete no folin ne’ebé mak oferese ba klase rua hanesan klase ekonomia folin mínimu $80, no másimu $250, nune’e mós klase business ninia folin $270 to’o $300 resin.

Maibé, folin ne’ebé durante ne’e implementa no iha tempu naruk nia laran pasajeiru sira asesu ba folin ne’ebé mak mínimu hanesan $ 80, $90, no $100.

Ikus-ikus ne’e folin sa’e ba $200 resin, maibé importante nia folin labele sai husi akordu $260 ba leten, ne’e sai husi akordu no sira viola akordu.

Bainhira operadór sira la tuir akordu, governu liuhosi Ministériu Transporte no Komunikasaun (MTK) no AACTL iha kompeténsia tomak para bele regula no bele iha sansaun ruma kona entidade responsavel.

Evita hasa’e folin tuir hakarak, Ministru ne’e fó ona instrusaun ba operadór aviaun sira katak iha situasaun saida de’it, presu ticket tenke normal, labele kontra regra no tuir akordu ne’ebé mak iha exeptu iha situasaun estraordinária ruma.

Jornalista: Julia Chatarina

Editór : Manuel Pinto 

HAKEREK NO HATÁN

Please enter your comment!
Please enter your name here