Enkontru entre Enviada espesiál Prezidente Roménia, Daniela Gîtman, ho Prezidente Repúblika (PR), Francisco Guterres Lú Olo. Imajen Mídia PR

DILI (TATOLI)—Enviada espesiál Prezidente Roménia, Daniela Gîtman, tersa ne’e iha Palásiu Prezidente Nicolau Lobato, Bairru Pité, hasoru malu ho Prezidente Repúblika (PR), Francisco Guterres Lú Olo, hodi ko’alia kona-ba relasaun bilaterál entre nasaun Timor-Leste no Roménia.

Enviada espesiál agradese enkontru ho Xefe Estadu hodi ko’alia kooperasaun atu hametin liu-tan diálogu polítika no foka ba dimensaun ekonomia no komersiu entre nasaun rua.

Iha oportunidade ne’e, Daniela Gîtman informa ba Prezidente Repúblika kona-ba projetu sira ne’ebé iha relasaun ho hametin konetividade hodi dada besik Timor-Leste no Roménia no Europa ho Ázia Sudeste liuhusi kooperasaun informasaun no teknolojia, peskiza, dezenvolvimentu, edukasaun no infraestrutura.

Enviada espesiál apresia rezultadu enkontru ho Prezidente Repúblika ne’ebé pozitivu tebes no nia hein katak katak relasaun entre nasaun rua sei sai forte liu-tan tanba iha tinan 2019 Roménia sei prezide Komisaun Uniaun Europeia no kompromete Uniaun Europeia sei tau atensaun boot liu-tan ba Timor-Leste.

Tinan oin, Roménia sei organiza Konferénsia Internasional ba Edukasaun ne’ebé ministru edukasaun sira hosi nasaun Sudeste Aziátiku ho Europa, hein katak Timor-Leste bele partisipa.

Daniela Gîtman dehan, kooperasaun entre nasaun rua bele fasilita estudante Timoroan kontinua nia estudu iha Roménia no fila mai Timor-Leste nu’udar sira-nia embaixadór hodi promove Roménia.

Iha enkontru ne’e, Enviadu Espesiál konvida Prezidente Repúblika atu vizita nasaun Roménia iha tempu oin.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here