Deputadu sira halo votasaun iha diskusaun espesialidade Orsamentu Jerál Estadu (OJE) 20018 iha uma fukun Parlamentu Nasionál. Imajen António Goncalves

DILI, (TATOLI) – Bankada opozisaun Frente Revolusionaria Timor-Leste Independente (FRETILIN) foti pozisaun polítika hodi kontra proposta projetu lei ba atividade petrolíferu.

“Alterasaun ida ne’e ladiak ba Estadu Timor-Leste, tanba sei halakon poder fiskalizasaun Tribunál Kontas nian no bele la liu Orsamentu Jerál Estadu nian,” tenik Deputadu FRETILIN, Joaquim dos Santos Boraluli, liuhosi komunikadu ne’ebé divulga.

Parlamentu Nasionál (PN) kuarta ne’e liuhosi plenária halo ona votasaun iha finál globál hodi aprova Projetu Lei númeru 2/V (1ª), alterasaun dahuluk ba lei númeru 13/2005 loron 2 fulan-setembru ne’ebé aprova lei atividade petrolíferu ho rezultadu a favór 37, kontra 22, abstensaun 0.

Hodi hatutan: “Efetu ida husi alterasaun ba lei ida ne’e bele mós haboot poder informál ida fora husi estrutura poder formál atu kontrola Estadu”.

Tuir antigu deputadu ne’e, FRETILIN rejeita alterasaun tanba sei hasai poder fiskalizasaun Tribunal Kontas nian no konsidera inkonstitusionál no sei halakon prinsípiu transparansia, boa governasaun, no check and balance iha Estadu.

Nune’e mós deputadu FRETILIN, Antoninho Bianco, reforsa alterasaun ne’e bele hamosu nepotizmu no loke dalan atu grupu kiik ida de’it mak kontrola rikusoin Timor-Leste tomak.

Alterasaun ba artigu ne’e mós fó autorizasaun atu kontratu fa’an no sosa, akizisaun no transferénsia sira iha atividade petrolífera la sai sujeitu ba fiskalizasaun previa Kámara Kontas nian.

Proposta atu altera artigu rua ne’ebé halo referénsia ba Tratadu Fronteira Marítima asina iha loron 6 marsu 2018, FRETILIN haree katak alterasaun ne’e viola Konstituisaun nomós lei internasionál kona-ba tratadu internasionál sira, tanba bainhira tratadu fronteira maritima ne’e Timor-Leste ho Austrália seidauk ratifika, tratadu ida ne’e seidauk vinkula.

Iha proposta alterasaun ba artigu 22, FRETILIN haree katak proposta alterasaun ne’e hakarak atu atribui kompetánsia ba Konsellu Ministru ka Primeiru-Ministru atu deside partisipasaun pesoa koletiva públika ka sira seluk iha atividade petrolifera iha Timor-Leste.

“FRETILIN nota katak alterasaun ne’e bele loke dalan ba grupu elite kiik ida de’it iha Timor-Leste mak sei sai riku liu tan no kontrola riku soin Timor-Leste nian”, refere komunikadu FRETILIN.

Entretantu, projeitu lei ne’e kompostu husi artigu 3, ne’ebé artigu 1.º relativu ho objetu no determina lei ne’ebé aprova alterasaun dahuluk Lei n.º 13/2005 2 setembru, enkuantu artigu 2.º estabelese redasaun foun husi artigu 22 Lei n.º 13/2005, no ikus liu artigu 3.º estipula entrada em vigor lei iha loron tuir mai husi publikasaun no produsaun, no halo iha loron 27 setembru 2018.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here