Prokuradór PALOP no Timor-Leste Reuniaun iha Olanda. Foto: Instituto Camões, IP

DÍLI, (TATOLI)-Prokuradór 23 husi PALOP (Países Africanos da Língua Oficial Português) no Timor-Leste halo reuniaun, iha Fórum Haia-Olanda hodi reforsa kooperasaun judisiária, fahe koñesimentu no prátika di’ak sira nomós kria rede informal entre Majistradu Ministériu Públiku PALOP no Timor-Leste nian.

Reuniaun ne’e promove husi Eurojust ho Camões, IP, ho partisipasaun husi Europol no Tribunál Penál Internasionál.

Tuir komunikadu Instituto Camões diriji ba Ajénsia TATOLI katak programa ne’ebé hala’o durante loron rua iha sede Eurojusta ne’e, ho aprezentasaun no debate sira kona-ba kooperasaun judisiária iha matéria penál, ho enfoke iha papel organizmu europeu ne’e nian, hodi promove koordenasaun entre autoridade judisiária husi estadu membru Uniaun Europeia kompetente ba investigasaun no ezersísiu asaun penál relasiona ho kriminalidade grave organizada iha natureza transnasionál.

Ko’alia mós kona-ba prinsípiu no instrumenta legál europeus no internacional no partilla modelu kooperasaun integrada hanesan Rede Judisiária Europeia ka rede CPLP (Comunidade dos Países da Língua Portuguesa).

Fórum ne’e mós posibilita partisipante sira husi PALOP no Timor-Leste hodi koñese Serviço Europeu de Polícia – Europol, ne’ebé apoia autoridade polisiál europeia hodi kombate kriminalidade internasionál no terorizmu no Tribunál Penál Internasionál.

PACE moris husi parseria Uniaun Europeia ho PALOP no Timor-Leste ho objetivu ba afirmasaun no konsolidasaun estadu direitu iha nasaun sira ne’e, liuhusi prevensaun no luta kontra korupsaun, brankeamentu kapitál no kriminalidade organizada, liliu, tráfiku estupefasiente (droga) sira.

Ho orsamentu euro millaun 8,4, ne’ebé millaun hitu finansia husi Uniaun Europeia no rihun 1,400 husi Camões, I.P. PACED ne’e projetu ida ne’ebé mak administra direta husi Camões, I.P, ne’ebé nia intervensaun sentra liu iha hadi’a ambiente legál no organizasaun administrativa, iha fortalesimentu ba kapasidade institusionál no atualizasaun prosedimentu operasionál nomós reforsu kooperasaun rejionál PALOP no Timor-Leste.

Jornalista: Rafy Belo

Editór  : Manuel Pinto

HAKEREK NO HATÁN

Please enter your comment!
Please enter your name here