Prezidente Repúblika, Francisco Guterres Lú Olo, bainhira hato’o nia diskursu iha Komemorasaun Masakre Santa Kruz ba dala 27 iha Semitériu Santa Kruz, segunda ne’e. Imajen Ajénsia Tatoli/Xisto Freitas

DILI (TATOLI)—Prezidente Repúblika, Francisco Guterres Lú Olo, hateten iha era ukun án juventude Timor-Leste iha tarefa importante tolu maka hanesan reforsa estadu, konsolida demokrasia no dezenvolve nasaun.

Tuir Lú Olo, liuhusi tarefa tolu ne’e sei liberta povu tanba juventude maka kriadór, enerjétiku no idealista.

Komunidade no mate restu sira partisipa iha Komemorasaun Masakre Santa Kruz ba dala 27 iha Semitériu Santa Kruz. Imajen Ajénsia Tatoli/Xisto Freitas

“Ema hotu hatete juventude maka futuru Nasaun nian. Saida maka futuru Nasaun? Oinsá ita konstrói Nasaun ohin loron? Ita konstrói ita-nia Nasaun liuhusi serbisu sidadania responsável. Ema ida-idak hatene saida maka tenke halo. Sidadaun ida-idak tenke kontribui ba produsaun rikusoin nasionál,” Xefe Estadu ba mate restu 12 Novembru 1991 no timoroan  sira liuhusi nia diskursu iha komemorasaun Masakre Santa Kruz ba dala 27 iha Semitériu Santa Kruz, segunda ne’e.

Maibé, nia dehan,ohin loron, dezempregu sai problema sériu Nasaun ninian, tanba ne’e, presiza esforsu ema hotu-hotu ninian.

“Ohin loron estudante rihun ba rihun maka hetan graduasaun tinan-tinan husi universidade iha área oi-oin no balun seluk ramata kursu vokasionál. Maioria joven buka maka serbisu públiku. Maibé, Estadu laiha kbi’it atu fó serbisu ba ema hotu-hotu, ne’ebé ramata kursu universitáriu ka formasaun vokasionál ka ensinu sekundáriu,” Lú Olo tenik.

Ho kestaun ida ne’e, tuir nia, lori joven sira tenke buka dalan seluk atu oinsá hetan rendimentu atu sustenta-án no família sira, signifika katak joven ida-idak tenke buka dalan atu sai empreendedór.

“Atu sai empreendedór, joven tenke fiar-án, iha talentu, kapasidade atu foti desizaun, determinasaun atu hakaat dezafiu ne’ebé de’it no iha kbiit finanseiru rasik ka simu insentivu ruma atu fila-liman no moris ho kbiit rasik,” nia hatutan.

Empreendór sira, nia hateten, bele hakfilak ekonomia susbsisténsia ba ekonomia merkadu no nune’e dezenvolve lalalis liu-tan nasaun ida ne’e.

“Ha ‘u fiar katak joven sira iha talentu atu hamosu no habelar ideia foun no tau iha merkadu produtu foun tuir nesesidade merkadu, bele halo jestaun di ‘ak ba sira-nia negósiu no hetan rendimentu rasik,” Prezidente esklarese.

Nia salienta katak iha ona inisiativa oi-oin atu habelar empreendorizmu iha Timor-Leste. Knua Juventude Fila Liman, ne’ebé UNDP harii, nu’ udar Sentru Juventude integradu ida ba inovasaun no empreendorizmu, fó dadaun hela formasaun.

“Atu habelar kultura empreendedora babebeik, Estadu Timor-Leste presiza haree oinsá serbisu ho setór privadu, hodi hanorin asuntu relevante ne’e iha instituisaun públiku no privadu, iha nível médiu no superiór no ensinu informál,” nia katak.

Liuhosi edukasaun no formasaun ho vizaun empreendedora, Lú Olo tenik, joven sira aprende sai líder, foti desizaun, serbisu nu’ udar ekipa no hatene buka-hetan solusaun ba problema sira.

Nia husu ba entidade relevante sira Governu nian presiza haree ho Banku Nasionál Komérisu Timor-Leste (BNCTL-sigla portugés) oinsá fó tulun ba joven empreendedór atu hahú negósiu ki’ik, ho tulun husi liña kréditu ida ne’ebé la obriga selu kedas ka selu ho juru ki’ik.

Atu lori juventude ba moris di’ak, Lú Olo informa, líder sira tenke umilde, iha espíritu atu serbí interese povu nian, sai transparente iha asaun, atua hodi halakon kiak no hatene hatán ba ema umilde sira-nia nesesidade.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here