Eis Prezidente-Repúblika, José Ramos Horta

DILI (TATOLI)—Eis Prezidente Repúblika, José Ramos Horta, husu ba órgaun soberania sira atu respeita malu para bele sai ezemplár ba joven sira, sosiedade sivíl no povu.

“Ha’u husu de’it ba Parlamentu no partidu polítiku sira katak maske bele la konkorda karik ho Prezidente Repúblika nia hanoin, prinsípiu no nia desizaun ruma maibé nia Xefe Estadu. Ita tenke iha prátika kultura ida respeita órgaun ne’ebé eleitu. Bainhira órgaun soberania sira la respeita malu ne’e fó ezemplu saida ba joven sira, ba sosiedade sivíl no povu,” Horta ba jornalista sira iha Palásiu Prezidente Nicolau Lobato, Bairru Pité, kinta ne’e, relasiona ho Parlamentu Nasionál halo kanselamentu ba Prezidente Repúblika nia viajen traballu ba Vatikanu iha 23 Novembru.

Horta hateten kanselamentu viajen Prezidente Repúblika ba estranjeiru ne’e bele fó impaktu negativu ba Timor, tanba liuhusi viajen sira ne’e maka bele hametin relasaun polítika, ekonomia, seguransa no espirituál ho Timor.

“Ne’e duni, ha’u halo apelu ba Prezidente Parlamentu no bankada sira para sira rasik halo enkontru foun nune’e muda karik sira nia pozisaun,” nia tenik.

Nia fiar katak Primeiru-Ministru, Prezidente Repúblika no Prezidente Parlamentu Nasionál sei kontinua sira nia kontatu no esforsu para hetan solusaun ba pose membru governu nune’e estrutura Governu bele kompletu nomós Prezidente bele hala’o nia kna’ar nu’udar embaixadór númeru ida Timor nian iha mundu.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here