Provedora eleitu, Jesuina Maria Ferreira Gomes hetan posse perante Prezidente Parlamentu Nasional, Arão Noe. Imajen: Media MRLAP

DILI (TATOLI) – Provedora Direitu Umanu no Justisa (PDHJ) eleitu, Jesuína Maria Ferreira Gomes hetan posse perante Prezidente Parlamentu Nasionál (PPN), Arão Noe iha sala konferénsia Parlamentu Nasionál (PN) kuarta ne’e, hodi assume kargu durante tinan haat.

Parlamentu Nasionál (PN) dezigna Jesuína husi maioria absoluta votu deputadu sira, hodi substitui Silvério Pinto Baptista, ne’ebé termina ona mandatu iha loron 30 Outubru.

PPN husu ba provedora eleitu atu bele kontinua progresu servisu sira ne’ebé provedór anterior halo, atu nune’e bele iha kontinuidade ba oin no bele hala’o knar tuir konstituisaun haruka.

“Bele hala’o knar tuir lei no konstituisaun haruka atu defende ema nia direitu, tanba  nia knar ne’e barak liu hasoru órgaun estadu, tanba   ne’e ami husu para bele forte atu bele enfrenta problema sira no defende sidadaun sira nia direitu no interese”, tenik.

PDHJ eleitu, Jesuína Maria Ferreira Gomes hateten ho esperiénsia servisu tinan haat iha provedoria, misaun husi instituisaun ne’e mak atu promove direitus humanus no governasaun diak no nia iha vizaun ba futuru hodi reforsa kooperasaun institutional ho governu.

“Ha’u nia planu durante tinan haat, prioridade sira ne’e mak sei tau no hametin parseria ho instituisaun hotu tanba  provedoria nia devér mak hametin kooperasaun ho instituisaun hotu tanba  provedoria nia ezisténsia atu fó apoiu no ajuda ba instituisaun sira para sira labele halo violasaun ba direitu umanu no boa governasaun”.

Entretantu kompeténsia Provedora tuir Lei Parlamentu nú 7/2004 5 maiu konaba estatutu PDHJ, mak halo investigasaun ba violasaun direitus humanus no liberdade no garante fundamental ba situasaun abuzu podér, mal administrasaun, ilegalidade, injustisa manifesta no auzénsia prosesu ne’ebé justu no ekuitativu hanesan situasaun nepotizmu, tráfiku influensia no korrupsaun.

Nune’e mós halo fiskalizasaun no rekomendasaun, promosaun  direitu umanu no boa governasaun , kombate korrupsaun, kombate korrupsaun no kombate ba tráfiku influensia.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here