KESPTL foto hamutuk ho MESSK. Foto: Rafy Belo

DILI, (TATOLI) – Governu liuhusi Ministériu Ensinu Superiór, Siénsia no Kultura (MESSK) asina Nota Entendimentu ho Klibur Ensinu Superiór Privadu Timor-Leste (KESPTL) hanesan IOB (Instituto of Bussiness), IPDC (Instituto Professional De Canossa), ICR (Instituto de Ciências Religiosas), ISC (Instituto Superior de Cristal) no UNITAL (Universidade Oriental Timor Lorosa’e) hodi aloka subsídiu rihun dolar 37 resin hodi investe rekursu umanu, atu reforsa kualidade edukasaun iha Timor-Leste.

Ministru Ensinu Superiór, Siénsia no Kultura, Longuinhos dos Santos, hateten objetivu ne’e mak atu atu hasa’e grau ka nivel dosente sira ba doutoramentu.

Ba jornalista sira iha sala konferénsia MEJD Vila-verde, ohin, governante ne’e hatutab subsídiu ne’e atu hasa’e kualidade.

Nia dehan dahuluk ko’alia kona-ba kuríkulu ne’ebé adopta iha universidade iha diferensa. Tanba ne’e, polítika Governu atu uniforma.

“Ita atu prodús rekursu umanu ida, ita labele tuir kuantidade maibé ita buka kualidade, nune’e bele fó benefísiu, atu bele dezenvolve ita-nia rain ida ne’e ho di’ak. Ema ne’ebé mak atu serbisu iha kualifikasaun”, afirma.

Enkuantu, iha ámbitu asina nota, Ministru katak programa ne’e la’ós foun maibé kontinuasaun husi subsídiu 2013 liubá. Depois 2019 se iha posibilidade hamosu subsídiu foun ba kandidatu bolseiru foun, ne’ebé mak sei planu.

Ministru mós hatutan kauza balun ne’ebé mak iha, liliu ba ensinu superiór privadu seluk ne’ebé mak akontese, entaun ita pendente tiha, tanba utiliza la tuir matadalan ne’ebé mak iha.

“Entaun ida ne’e sai hanesan referénsia ida mai ita hotu tanba Oitavo Governu Konstitusionál mosu atu bele haree ba poupansa no atu haree ba kualidade ensinu superiór liliu ensinu superiór privadu nomós públiku”, tenik.

dehan governante ne’e.

Alende hadi’a kualidade no kuríkulu. Objetivu prinsipál seluk mak promove lian-portugés.

“Ha’u mós husu ba ensinu superiór privadu sira hotu katak hala’o no la’o tuir matadalan no nota entendimentu ne’ebé mak iha, nune’e bele motiva governu atu bele hamosu programa foun ba futuru nian. Se subsídiu ne’e ita-boot sira la utiliza ho di’ak mak programa foun difísil atu mosu tanba ida ne’e sai hanesan sasukat ba ita hotu nomós sai hanesan referénsia”.

Iha fatin hanesan, Prezidente KESPTL, Reitór IOB, Augusto da Conceição, hodi universidade benefisiáriu sira agredese no hato’o obrigadu wa’in ba governu tan bele asina ona nota entendimentu hodi hasa’e dosente sira nia kapasidade hodi ba estuda iha li’ur.

Reitór IOB, Augusto da Conceição, mós akresenta apoiu ne’ebé governu fó labele hela no para de’it iha ne’e maibé bele mós fó atensaun, nune’e hasa’e kualidade edukasaun. La’ós de’it ba universidade haat de’it maibé mós ba universidade seluk.

“Tanba ne’e husu ba ministru ho diresaun hotu katak fó atensaun nafatin mai ami ensinu superiór privadu sira ne’ebé akreditada, nune’e sai hanesan parseiru ba ministru edukasaun oinsá dezenvolve rekursu umanu ne’ebé kualidade hodi atende nesesidade nasaun ida ne’e”, solisita reprezentante ne’e.

Prezidente KSPTL mós rekomenda ba governu katak apoiu labele iha de’it ba aumenta nuvel ka grau dosente sira nian maibé mós ba formasaun dalen-portugés, peskiza no seluk tan.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here